იუსტიციის მინისტრი თეა წულუკიანი ახალ კანონს კიდევ ერთხელ განმარტავს:
“როდესაც 2012 წლის გაზაფხულზე ნაციონალურმა მოძრაობამ ამ ქვეყანაში შემოიტანა სუროგაციის ინსტიტუტი, მაშინვე, იმ პერიოდიდანვე არ იყო დაშვებული ერთი ადამიანის მიერ სუროგაციის პროცესი, მარტოხელა მშობლის მიერ. შესაბამისად, დღეს აღშფოთება იმასთან დაკავშირებით, რომ ნაციონალურმა მოძრაობამ სუროგაცია რომ შემოიტანა საქართველოში, მარტოხელა მშობელს არ მისცა სუროგაციის უფლება, ვფიქრობ, არის დაგვიანებული მინიმუმ რვა წლით. როგორც არ იყო მარტოხელა მშობლისთვის სუროგაცია 2012 წლის აპრილში შესაძლებელი, ისე არ არის ეს დღეს. რვა წლის განმავლობაში ნაციონალური მოძრაობის მიერ შემოტანილ აბსოლუტურად რეგულაციების გარეშე სუროგაციას, რომელიც ტრეფიკინგის ღია წყარო იყო, შევუქმენით გარკვეული პირობები, რათა ჩვენი შვილებით ვაჭრობა საქართველოში იყოს შეუძლებელი.
ვინც არის ან უნაყოფო წყვილი, ან წყვილი რომელსაც ჰყავს შვილები, მაგრამ უნდა რომ ჰყავდეს სხვა ბავშვი სუროგაციის მეშვეობით, რა თქმა უნდა, მათთვის სუროგაცია კვლავ შესაძლებელია, მაგრამ გარკვეული დათქმებით, რათა არამხოლოდ ბავშვის, არამედ იმ სუროგატი დედის უფლებებიც იყოს დაცული. ძირითადად, ესენი არიან 100% საქართველოს მოქალაქეები, ქართველი ქალები, რომელთა მუცელს და საშვილოსნოს იყენებენ ის ადამიანები, ვინც ჩამოდიან უცხოეთიდან და სუროგაციის სერვისით საქართველოში ქართველი ქალები ემსახურებიან მოქალაქეებს რომელთა 90% არის უცხოელი. რა თქმა უნდა, ეს არ იკრძალება, მაგრამ არის მკაცრი რეგულაციები. ჩვილით ვაჭრობა ვერ იქნება დაშვებული ამ ქვეყანაში, ქალთა უფლებები უნდა იყოს დაცული ამ ქვეყანაში”
მისასალმებელია, რომ ქართველი ქალების მუცელს და საშვილოსნოს იცავს მინისტრი, კიდევ უფრო მისასალმებელი იქნებოდა, ქართველი ბავშვების კუჭის უფლებებიც რომ დაეცვა…
ქართული საშვილოსნოს დაცვა ქორწინების ერთწლიანი მოწმობით თუ გახდება შესაძლებელი, ვნახოთ.
მანამდე კი, კიდევ ერთხელ მივმართავთ შსს-ს და სუს-ს, დაკითხეთ ქალბატონი თეა, რომელიც უკვე ამდენი დღეა ღიად აცხადებს, რომ ბავშვთა უკანონო და ტრეფიკინგის ფაქტები აქვს.
ალია
კომენტარები