ვლადიკავკაზში მცხოვრებ ბავშვთა ფსიქოლოგს ანტონ შიშენკოს ბავშვებზე სექსუალური ძალადობისთვის 17 წლით თავისუფლების აღკვეთა მიესაჯა.
ჟურნალისტ ელიზავეტა ჩუხაროვას ცნობით, მიუხედავად იმისა, რომ შიშენკომ 50-ზე მეტი დანაშაული აღიარა, იგი მხოლოდ ორ ბრალდებაში იქნა დამნაშავედ ცნობილი.
ამასთან, შიშენკოს 20 წლის განმავლობაში ბავშვებთან მუშაობაც აეკრძალება, კაცს დამატებით დაუნიშნეს იძულებითი ფსიქიატრიული მკურნალობაც.
ანტონ შიშენკოს წინააღმდეგ სისხლის სამართლის საქმე მარტის ბოლოს აღიძრა. პროკურორების თქმით, გამოძიება მას შემდეგ დაიწყო, რაც ბავშვმა სექსუალური შინაარსის ნახატები დახატა. გამოძიების მსვლელობის პროცესში გამოიკვეთა დამატებითი სავარაუდო დაზარალებულები და გაიზარდა სავარაუდო დანაშაულების რაოდენობაც.
ადგილობრივი Telegram არხების ცნობით, გამოძიების საწყის ეტაპზე შიშენკომ ბრალდებები ნაწილობრივ აღიარა და გამომძიებლებს რამდენიმე ათეული – 50-მდე მსხვერპლი ბავშვის შესახებ უამბო. მშობლების თქმით, ის თერაპიის სესიების დროს უფროსებს სისტემატურად სთხოვდა გარეთ დალოდებას იმ საბაბით, რომ ბავშვებს მასთან ინდივიდუალურად მუშაობა სჭირდებოდათ. მშობლები ასევე აცხადებენ, რომ ის ბავშვებს ემუქრებოდა – ეუბნებოდა, რომ მომხდარის შესახებ მშობლებისთვის თქმის შემთხვევაში მათ ბავშვთა სახლში გაგზავნიდნენ.
შიშენკო თითქმის 30 წლის განმავლობაში მუშაობდა განვითარების შეფერხების მქონე ბავშვებთან, მათ შორის აუტიზმის სპექტრისა და დაუნის სინდრომის მქონე პირებთან. ის პაციენტებს ვლადიკავკაზში, თავის კერძო სარეაბილიტაციო ცენტრში იღებდა.
მედიის ცნობით, დაკავების შემდეგ შიშენკომ საგამოძიებო იზოლატორში თვითმკვლელობა სცადა.
კომენტარები