თბილისის ცენტრალურ რკინიგზის სადგურზე დღეს დილით ხმაური იყო. აქციებზე დაკავებული აქტივისტების მშობლებს, რომლებიც აჭარაში პატიმრების წერილების გასავრცელებლად მიემგზავრებოდნენ, საპროტესტო ბანერებით ბაქანზე ასვლის უფლება არ მისცეს.
ადგილზე მობილიზებული იყო პოლიცია. სამართალდამცველებმა მატარებელში რამდენიმე პირს ადმინისტრაციული ოქმი შეუდგინეს, რის გამოც მატარებელი დაახლოებით 30 წუთის დაგვიანებით გავიდა.
ინციდენტის პარალელურად სადგურზე ისმოდა შეძახილები: „თავისუფლება რეჟიმის ტყვეებს!“.
მშობლები დღეს ბათუმში ჩასვლას და იმ გაზეთების დარიგებას გეგმავენ, სადაც აქტივისტების წერილებია დაბეჭდილი. ოჯახის წევრების თქმით, მნიშვნელოვანია მათი ხმა მოქალაქეებამდე მივიდეს.
“რეგიონებში სიარული, როგორც ასეთი, მძიმეც არის, ძალიან ძნელიც არის ამდენ ხალხთან ურთიერთობა, მაგრამ სხვა გზა დედებს არ დაგვრჩენია, იმიტომ, რომ რეგიონებში უფრო ვპოულობთ ჩვენს შვილებზე ტკბილ, თბილ სიტყვებს, ერთიანობას, რაც გაგვიტანს საქართველოში და სხვა გზა არ გვაქვს არცერთს, რომ გავჩერდეთ და გავჩუმდეთ. ამიტომ რკინის ქალამნებჩაცმულები დავდივართ ყველგან და ვაპირებთ, ყველასთან მივიტანოთ ჩვენი შვილების ხმა, – ამბობს გიორგი მინდაძის დედა.
კომენტარები