თელავში ამ დრომდე სტიქიას ებრძვიან. ადგილობრივები იმ მძიმე ვითარებას აღწერენ, რომელიც ღამით დაიწყო და ამ დრომდე გრძელდება.
თელავის მცხოვრებლები ამბობენ, რომ ძლიერი წვიმის შედეგად თელავის ხევი კალაპოტიდან გადმოვიდა, ადიდებულმა წყალმა კი გზები ქვა-ღორღით დაფარა, ხეები მოგლიჯა და ქალაქის რამდენიმე უბანში გადაადგილება მნიშვნელოვნად გაართულა.
“მე სახლში ვიყავი. სამ საათზე დაიწყო, მთელი ღამე წვიმდა და მთელი ქვა-ღორღი წამოიღო ზევიდან. ჩვენ ხომ პატრონი არ გვყავს, თელავს, და მთელი ხეები და ისინი ჩახერგილია იქ, ამის ბრალია”, – ამბობს ადგილობრივი.
მოქალაქეები ამბობენ, რომ გამთეენისას ქუჩაში გასვლა მოუწიათ.
“ღამის სამი საათი იყო, ძალიან წვიმდა, რომ დაუშვა, უკვე ხუთ საათზე ხალხი იყო გარეთ. ხიდი დაინგრა და ხალხს პირველ სართულზე წყალი შეუვარდა. დენი და გაზია გათიშული”,- ამბობს მოქალაქე.
“აღარ მახსოვს, ოთხი ხდებოდა, რომ პატრულის ხმამ გამაღვიძა, რომ ყველა მანქანა გარეთ გამიყვანეთო. მას აქეთ გარეთ ვართ, ამ საშინელებას ვუყურებთ, წყალმა უკვე შემოაღწია (სახლში)”, – ამბობს მოქალაქე.
კომენტარები