„გახარია საქართველო” სამართალდამცავი ორგანოების ერთ–ერთ წარმომადგენელს, მამუკა მდინარაძეს პასუხობს.
საუბარია, “ქართული ოცნების” ლიდერის განცხადებაზე, სადაც მან თქვა, რომ მსოფლიოში არ არსებობს პრეცედენტი, რომ გამოძიება დაწყებულიყოს პარლამენტში მომხდარი ჩხუბის გამო.
ოპოზიციონერებმა ვიცე-პრემიერის კომენტარის საპასუხოდ საერთაშორისო პრაქტიკა მოიყვანეს, როცა პარლამენტში ჩხუბის შემდეგ დეპუტატების პასუხისმგებლობის საკითხი დადგა.
- 2012 წელს დიდ ბრიტანეთში დეპუტატი იმის გამო დააკავეს, რომ პარლამენტში იჩხუბა
- 2018 წელს კი სამხრეთ კორეაში 30 დეპუტატის სისხლის სამართლის პასუხისმგებლობა დადგა პარლამენტში მომხდარი დაპირისპირების გამო.
- 2022 წელს სენეგალში, ბიუჯეტის განხილვის დროს, ორმა დეპუტატმა კოლეგა სცემა, ორივე მათგანს 6 თვიანი პატიმრობა მიესაჯა.
- 2024 წელს საბერძნეთში მომხდარი ჩხუბის გამო, დეპუტატს 4 წლიანი პირობითი პატიმრობა მიუსაჯეს
“ეს არის დასტური იმისა, რომ საქართველოში კანონზე მაღლა დგანან მდინარაძის ე.წ. მეგობრები. ეს არის კიდევ ერთი შეხსენება ჩვენი საზოგადოებისთვის, რომ სანამ “ქართული ოცნება” იქნება ხელისუფლებაში, არ იქნება კანონის უზენაესობა ქვეყანაში, არ იქნება დემოკრატია”. – თქვა დეპუტატმა გიორგი შარაშიძემ.
შეგახსენებთ, საქართველოს პარლამენტში დაპირისპირება დაახლოებით ორი კვირის წინ მოხდა. გახარიას პარტიამ პროკურატურასაც მიმართა ძალადობაში მხილებული “ქართული ოცნების” წევრების მიმართ სამართლებრივი დევნის დაწყების მოთხოვნით , თუმცა უწყებას გამოძიება ამ დრომდე არ დაუწყია.
კომენტარები