ყოფილი პარლამენტარი დავით ზურაბიშვილი:
,,პარლამენტის სხდომათა დარბაზში გავეშებული ოცნების დეპუტატები ოპოზიციონერ კოლეგას ჯერ კიდევ სცემდნენ, როდესაც ტვ. იმედმა ქარდი გამოდო და გახარიას პარტიას დააბრალა ჩხუბის პროვოცირება.
ოდნავ მოგვიანებით იგივე გაიმეორა ევროკავშირის რისხვამ და ბრიუსელის ღამის კოშმარმა, შალვა პაპუაშვილმა, უკადრებელი იკადრეს გახარიას მომხრეებმა და ქართველი კაცი ღირსების შეურაცხყოფას არავის პატიობსო.
მერე იყო და მთელი სახელისუფლო პროპაგანდა ჩხუბის კადრების ფრაგმენტული ჩვენებით ცდილობდა ისეთი სურათის წარმოჩენას, თითქოს შეხლა-შემოხლა ოპოზიციონერებმა დაიწყეს და როგორც ერთ-ერთმა მოძალადე დეპუტატმა თქვა, “უმრავლესობა ძირითადად აშველებდა.”
ხელისუფლების პროპაგანდისტები, ტროლები, ბოტები და მათთან გათანაბრებული უძირო ქოცებიც რასაკვირველია, ყველაფერს წყეულ ოპოზიციას აბრალებდნენ და თან ნიშნის მოგებით გვეუბნებოდნენ, ეგრე მოგიხდებათ თქვენ, ენას რომ არ აჩერებთო.
და დღეს, ჰოი საკვირველებავ, გადმოდგნენ ეს მუშტიქნევია დეპუტატები და ერთი-მეორის მიყოლებით, ბოდიშს ვუხდით საზოგადოებას, არ უნდა გვექნა ეს ცუდი საქმე და საერთოდ ეს არაა ჩვენი სტილიო.
რა მოხდა და რატომ შეცვალეს პირველი ჩვენება, მართალი გითხრათ არ ვიცი, მაგრამ წმინდა თეორიულადაც კი არის მხოლოდ სამი ვარიანტი.
ა) თავად მიხვდნენ, რომ შეეშალათ და ნანობენ.
ბ) ბიძინამ დატუქსა.
გ) გამოკითხვამ აჩვენა, რომ ხელისუფლების მომხრეებში და ნეიტრალურად განწყობილებში უპირატესად ნეგატიური რეაქცია გამოიწვია ოცნების დეპუტატთა საქციელმა.
მე პირადად ვიხრები უფრო “გ” ვარიანტისკენ. არც იმას გამოვრიცხავ, რომ ამ გამოკითხვის შედეგების გაცნობის შემდეგ “ბ” ვარიანტიც მომხდარიყო.
ვარიანტი “ა”, რასაკვირველია, გამორიცხულია. უბრალოდ წმინდა ინტელექტუალური კეთილსინდისიერების ამბავში დავწერე, როგორც თეორიული დაშვება.“
კომენტარები