“პოლიცია ურმით უნდა დადიოდეს? – თუმცა, ნუ, ასე არ არის საჭირო მანქანების შეძენა” – კობახიძე

ქართული ოცნების ლიდერი, ირაკლი კობახიძე, შსს–ს აქებს მუშაობისთვის, აცხადებს, რომ ახალი მანქანები სჭირდებათ, აბა, ურმით ხომ არ ივლიან, თუმცა, ამდენი ახალი მანქანაც არ სჭირდებათ. რატომ იყო რამდენიმე წლის წინ გამოშვებული მანქანები ურმები – ამაზე არ უსაუბრია, ისევე, როგორც იმაზე, მაინც რამდენი ახალი მანქანა სჭირდებოდათ და რამდენით მეტი შეიძინეს. რა დასკვნა უნდა გამოიტანოს აქედან შს მინისტრმა, უნდა იყიდოს, არ უნდა იყიდოს, რამდენი უნდა იყიდოს და როგორ – უცნობია.

კობახიძე:

განახლდა ინფრასტრუქტურა და მატერიალურ-ტექნიკური ბაზა შინაგან საქმეთა სამინისტროში. ავტოპარკი შეივსო 597 ახალი ავტოსატრანსპორტო საშუალებით. ჩვენს ოპონენტებს ჰგონიათ, რომ პოლიცია ურმით უნდა ებრძოდეს კრიმინალს, თუმცა ნუ ასე არ არის, საჭიროა, რა თქმა უნდა, მანქანების შეძენა.

მნიშვნელოვნად გაძლიერდა შინაგან საქმეთა სამინისტროს მიგრაციის დეპარტამენტი და საანგარიშო პერიოდში იმაზე მეტი არალეგალი მიგრანტი იქნა გაძევებული ქვეყნიდან, ვიდრე გასული 10 წლის განმავლობაში.

საორიენტაციოდ არის 20 000-მდე არალეგალი მიგრანტების რაოდენობა ჩვენს ქვეყანაში. რა თქმა უნდა, ჩვენი ამოცანაა, რომ ნულამდე დავიყვანოთ ეს მაჩვენებელი.