“აფბასთვის მნიშვნელოვანი იყო, რომ გზავნილი, რომელიც არაერთი მედია საშუალებით მიეწოდა ნათია ჯანაშას მხარეს, მოსმენილი და გაზიარებული იქნა. ქალბატონმა ნათია ჯანაშიამ ფეისბუქის პირად გვერდზე საჯაროდ დადო პირობა, რომ ბიზნესდავისგან მოახდენს არასრულწლოვანი შვილების დისტანცირებას. ეს ნიშნავს, რომ არასრულწლოვანი ბავშვების საკითხი, რომელიც, სამწუხაროდ, ამ ბიზნესდავის პერიპეტიებში გამოჩნდა სხვადასხვა კონტექსტში, აღარ განმეორდება“, – აცხადებენ ახალგაზრდა ფინანსისტთა და ბიზნესმენთა ასოციაცია – აფბაში.
აფბა „ბრიტანულ-ქართული აკადემიის“ ბიზნესდავის მონიტორინგს ახორციელებს. დავა აკადემიის ყოფილმა დირექტორმა და მინორიტარმა, ნათია ჯანაშიამ წამოიწყო 2024 წელს, როდესაც მის დირექტორობიდან გათავისუფლების საკითხი დააყენა ინვესტორმა და 70%-იანი წილის მფლობელმა – „საქართველოს განათლების ჯგუფმა“.
აფბას ანალიტიკოსის, ბაჩანა ჯინჭარაძის თქმით, ასევე მნიშვნელოვანი იყო, რომ ნათია ჯანაშიას მიერ დაშვებული შეცდომა – საკუთარ პოსტზე, რომელიც ბიზნესდავას ეძღვნებოდა, სხვისი მცირეწლოვანი შვილების ფოტოსურათის გამოქვეყნება მშობლების ნებართვის გარეშე – მითითების შემდგომ, გამოსწორებულ იქნა და ქალბატონმა ნათიამ დაფარა მცირეწლოვანი ბავშვების სახეები.
აფბას პრეზიდენტის აზრით, ნათია ჯანაშიას გადაწყვეტილება, შეწყვიტოს საკუთარი შვილების უცხო ქვეყნის მოქალაქეობის ტირაჟირება და სხვა ინფორმაციების გახმაურება და გასაჯაროვება საკუთარ კონტროლირებად გამოცემებში, ღია და საჯარო პოსტებში, გარდამტეხი მომენტია, რადგან საქართველოს ბიზნესდავების ისტორიაში არ ყოფილა შემთხვევა, რომ ღირსეულ საქმიან ადამიანებს დავაში უპირატესობის მოსაპოვებლად შვილები, მითუმეტეს, მცირეწლოვანი შვილები გამოეყენებინა.
„მოხარული ვარ, რომ ნათია ჯანაშიას მხარემ გაითვალისწინა ჩვენი ძალიან მკაცრი, მაგრამ ამავდროულად ძალიან სამართლიანი შენიშვნა. ეს მნიშვნელოვანი ნაბიჯია თავად ნათია ჯანაშასთვის და დარწმუნებული ვარ, რომ აღარასოდეს განმეორდება ის უმძიმესი ფაქტები, როდესაც მცირეწლოვანი ბავშვებით მანიპულირება სტრატეგიის ნაწილი გახდა. ღირშესანიშნავია, რომ ამ ფაქტს დადებითი გამოხმაურება მოყვა თავად ქალბატონ ნათია ჯანაშიას გამომწერების მხრიდან. ჩვენ გავაგრძელებთ ამ საკითხზე ჯეროვან დაკვირვებას და გვექნება შესაბამისი რეაქციები ნებისმიერ რეციდივზე,“ – ამბობს გიორგი კაპანაძე.
აფბაში აცხადებენ, რომ აგრძელებენ ნათია ჯანაშიასა და „საქართველოს განათლების ჯგუფის“ ბიზნესდავისა და მისი თანმდევი მოვლენების მონიტორინგს საქართველოსა და დიდ ბრიტანეთში და განასაკუთრებულ ყურადღებას დაუთმობენ დავაში მცირეწლოვანი ბავშვების არამართლზომიერი ჩართვის მცდელობის საკითხებს და ფინანსურ პოლიციაში აღძრული სისხლის სამართლის საქმის მიმდინარე გამოძიებას.
მკითხველს შევახსენებთ, რომ საქართველოს ფინანსთა სამინისტროს საგამოძიებო სამსახურში აღძრულია სისხლის სამართლის საქმე ნათია ჯანაშიას და მისი მეუღლის, დავით ცეცხლაძის მენეჯმენტში ყოფნის პერიოდში „ბრიტანულ-ქართული აკადემიის“ კუთვნილი განსაკუთრებით დიდი ოდენობის სახსრების მიტაცებისა და გაფლანგვაზე. საქმე „საქართველოს განათლების ჯგუფის“ განცხადების საფუძველზე აღიძრა. ავტორიტეტული საერთაშორისო აუდიტორული კომპანიის შეფასებით მიტაცებული/გაფლანგულია 4 მილიონი დოლარის სახსრები.
კომენტარები