კიკბოქსინგში საქართველოს ჩემპიონატში, 16 წლის ანამარია კურტანიძემ ბრწყინვალე ასპარეზობით ოქროს მედალი და ჩემპიონის ტიტული მოიპოვა. მისი მწვრთნელი ლაშა ჭეფხოძეა.
ანამარია, ცნობილი სპორტსმენის, ლუკა კურტანიძის ქალიშვილია.
ანამარიას დედა, ქეთი ყველაშვილი “ალიას” უყვება, რომ კიკბოქსინგში მხოლოდ მეორე წელია ვარჯიშობს, თუმცა, გოგონას პატარაობიდანვე სურდა სპორტსმენობა.
– მამის სპორტსმენობამ იქონია გავლენა?
– შესაძლოა, ხედავდა რომ მამა წარმატებული სპორტსმენი იყო. მე მინდოდა ცეკვა აერჩია, თუმცა, 2 წლის წინ საბოლოოდ მითხრა ცეკვაზე უარი და თქვა, რომ ეს არაა მისი და სპორტში ხედავს საკუთარ თავს. კიკბოქსინგამდე 2 წელი კარატეზე დადიოდა, თუმცა, საბოლოოდ, მაინც კიკბოქსინგი არჩია.
– მართლა მხოლოდ მეორე წელია ვარჯიშობს ამ სპორტში? და უკვე ამხელა წარმატება, ალბათ, მოულოდნელი იყო?
– უცნაურია იქნება ამას რომ ვამბობ, მაგრამ მიუხედავად იმისა, რომ მხოლოდ მეორე წელია ვარჯიშობს კიკბოქსინგში და პირველად გავიდა შეჯიბრზე, არ იყო მოულოდნელი, ველოდი. იმდენად ბევრს ვარჯიშობდა ყოველდღიურად, რუტინულად, იმდენად ძლიერი ადამიანია სულიერად, იმდენად სჯეროდა საკუთარი შრომის და საკუთარი თავის, იმდენად კარგი მწვრთნელიც ჰყავს თან, რომ სიმართლე გითხრათ და ველოდი, თავადაც ელოდა.
– მოტივატორი შრომის და ვარჯიშის, მამა იყო?
– სამწუხაროდ, არა. მამას არ აქვს შვილებთან ურთიერთობა, არც საბასთან და არც ანამარიასთან. ბავშვები არასოდეს წასულან წინააღმდეგნი, რომ მამას ენახა, თავად არ გამოთქვამს ამის სურვილს და ინიციატივას, ისევე, როგორც, არ გამოთქვამს სურვილს, მონაწილეობა მიიღოს მათ აღზრდაში ნებისმიერი ფორმით, ან როგორმე და რამით მაინც იზრუნოს მათზე. დღეს იმდენმა ადამიანმა მოულოცა, სკოლიდან არაერთი ზარი იყო, სრულიად უცნობი ადამიანები ულოცავენ სოციალურ ქსელში და მამამ არ მიულოცა, არადა, ალბათ, ამ ერთ ზარს ელოდა ყველაზე მეტად, თუნდაც ერთსიტყვიან მოლოცვას და თუნდაც, მხოლოდ იმის თქმას – ანამარია, ყოჩაღ, შვილო! ჯერ ერთი მამაა, მეორე – სპორტსმენია და განსაკუთრებულად ამიტომ ელოდა, ალბათ, როგორც ქალიშვილს, გული კიდევ ერთხელ და ძალიან ეტკინა.
– გამოხატა გულისტკენა?
– მთელი დღეა ელოდებოდა, რომ დაურეკავდა, ახლაც, უკვე გვიანი საღამოა და ისევ ელოდა. ყველა ზარზე ჰგონია, რომ მამა ურეკავს. ძლიერი გოგოა და ამ ტკივილსაც გადაიტანს. პატარაობისას ილუზიებს თავად ვუქმნიდი, თითქოს მამა ზრუნავდა მათზე, რომ წამოიზარდნენ და უკვე თავად ხედავდნენ, როცა თავად შეეჯახნენ, რომ მამა არ გამოთქვამს მათთან ურთიერთობის სურვილს, არ ზრუნავს მათზე, არ გრძნობს პასუხისმგებლობას მათ აღზრდაზე – სწორედ ამან გამოიწვია გულისტკენა, არ იყვნენ მზად იმისთვის, რაც დახვდათ, ვერ მოვამზადე, უფრო სწორად, არ მოვამზადე, რათა უფრო პატარა ასაკში არ სტკენოდათ გული. არ ვიცი ეს რამდენად სწორია, მაგრამ ის ვიცი, რომ ახლა ბევრად ძლიერები არიან და ბევრად გაძლიერებული შეხვდა ანამარიამ მორიგ გულისტკივილს.
– სპორტსმენი შვილების მოვლა–პატრონობა ფინანსურად დიდი ხარჯია საკმაოდ, არა?
– 2–3 საათი რომ ივარჯიშებს და გამოვა, მინიმუმ წყალი მაინც უნდა იყიდოს, ხომ? ორივე შვილი სპორტულად, ჯანსაღად ცხოვრობს და ჯანსაღი კვება საკმაოდ დიდი ფუფუნებაა. მაქსიმალურად ვცდილობ, გავწვდე, ხელი შევუწყო. თავიდან რთული იყო, არ მოვიტყუები, ახლა მგონი შევეჩვიე, რომ მათთვის დედაც მე ვარ, მამაც და მესამე ძალაც. ვიცი, რომ მამას ვერ შეუცვლით ეს, მაგრამ თავს იმით ვიმშვიდებ, რომ სამაგიეროდ, ძალიან ახლოს ვართ ერთმანეთთან, ერთად ვდგავართ, ერთად ვდგამთ წინ ნაბიჯებს და ეს ისეთი სასიამოვნოა, რომ ყველა განვლილ ტანჯვას მავიწყებს.
– მოგვიყევით რომ სკოლიდან არაერთი ზარი იყო, დირექტორის, დამრიგებლის, პედაგოგების და როგორც ვიცი, როგორც ჩემპიონის დედას, სკოლაში მისვლაც გთხოვეს – როგორი მოსწავლეა? არის ისეთივე კარგი მოსწავლეც, როგორიც სპორტსმენი?
– კი, ნამდვილად კარგი მოსწავლეა და სწორედ ისეთია, როგორიც სპორტში, ყოველდღიური სწავლით. გამორიცხულია მოუმზადებელი წავიდეს სკოლაში. როგორც სპორტს უთმობს დღის ნაწილს და ყოველ დღე ვარჯიშობს, ასეთივე პასუხისმგებლიანია სკოლის მასალის სწავლისასაც.
“ალია” ულოცავს 16 წლის ჩემპიონ ანამარია კურტანიძეს და უსურვებს კიდევ ბევრ გამარჯვებას.
კომენტარები