„საერთაშორისო გამჭვირვალობა საქართველოს” ცნობით, პარლამენტარ ვიქტორ ჯაფარიძის შვილის, გიორგი ჯაფარიძის თანამფლობელობაში არსებულმა კომპანია შპს “ექსპერტ ჰაუსმა” 2018 წლიდან დღემდე 10 446 411 ლარი მიიღო. TI-ის ცნობით, ამ ხნის განმავლობაში მან 24 ტენდერში გაიმარჯვა და 8 გამარტივებული შესყიდვა გააფორმა. ბოლო მილიონამდე ღირებულების ტენდერი კომპანიამ მესტიის მუნიციპალიტეტისგან წინა თვეში მიიღო.
TI-ის ინფორმაციით, შპს „ექსპერტ ჰაუსის” ძირითადი საქმიანობაა, ზედამხედველობა გაუწიოს სხვადასხვა მუნიციპალიტეტში ასევე სახელმწიფო შესყიდვებით განხორციელებულ ინფრასტრუქტურული ობიექტების სამშენებლო სამუშაოებს.
შპს „ექსპერტ ჰაუსი” 2016 წელს დარეგისტრირდა. გიორგი ჯაფარიძე კომპანიაში 43% წილს ფლობს, 5%-ს – მურად ჯობავა, 20% წილს – ირაკლი ქელბაქიანი, ხოლო 32% წილის მფლობელი და დირექტორი კახაბერ გამისონიაა. „საერთაშორისო გამჭვირვალობა საქართველოს” ცნობით, “ექსპერტ ჰაუსის” 43% წილს წარსულში ვიქტორ ჯაფარიძის უფროსი ვაჟი, ოთარ ჯაფარიძე ფლობდა. მან ეს წილი თავის ძმას 2023 წლის მარტში 300,000 ლარად მიჰყიდა .
არასამთავრობო ორგანიზაცია აღნიშნავს, რომ „ექსპერტ ჰაუსთან” დაკავშირებული პირები ფიქსირდებიან პოლიტიკურ შემწირველებს შორისაც: კახაბერ გამისონიამ 2014 წელს 15,000 ლარი შესწირა „ქართულ ოცნებას”, მურად ჯობავამ კი 2014-2017 წლებში 47,000 ლარი შესწირა ამავე პარტიას.
„ზემოაღნიშნული გარემოებები და შპს „ექსპერტ ჰაუსის” პირდაპირი კავშირები „ქართულ ოცნებასთან” აჩენს ეჭვებს სახელმწიფო შესყიდვებში მისი ჩართულობის კანონიერებასთან დაკავშირებით, რაც მიუკერძოებელ და ობიექტურ გამოძიებას საჭიროებს” – ნათქვამია „საერთაშორისო გამჭვირვალობა საქართველოს” მოკვლევაში.
კომენტარები