მსოფლიო ჯანდაცვის ორგანიზაციის ციფრული ჯანმრთელობისა და ინოვაციების დეპარტამენტის ექსპერტი, ნორვეგიის სამეფოს ჯანდაცვის სამინისტროს უფროსი მრჩეველი ზაზა წერეთელი ინფორმაციას ავრცელებს:
,,პარასკევს ბელგიის მთავრობამ მიიღო გადაწყვეტილება, რომლის მიხედვითაც 2028 წლის 1 სექტემბრიდან არომატიზებული ელექტრონული სიგარეტები (vapes) აიკრძალება. ნებადართული დარჩება მხოლოდ არომატის გარეშე ან თამბაქოს არომატით არსებული პროდუქტები.
მთავრობის განმარტებით, სხვადასხვა არომატი — როგორიცაა ხილი, ტკბილეული ან მენთოლი — განსაკუთრებით მიმზიდველია ახალგაზრდებისთვის და ხელს უწყობს მათ ჩართვას ვეიპინგში.
მთავრობა აღნიშნავს, რომ მსგავსი ზომები უკვე მოქმედებს ნიდერლანდებში, სადაც არომატების აკრძალვამ ვეიპინგის შემცირებას შეუწყო ხელი.
არსებობს ორი მიზეზი, რის გამოც ეს ზომა მხოლოდ 2028 წლის შემოდგომიდან ამოქმედდება.
პირველი — ეს რეგულაცია უნდა იქნეს შეტყობინებული ევროკავშირს (Technical Regulation Information System — ტექნიკური რეგულაციების საინფორმაციო სისტემა ) პროცედურის ფარგლებში, რომელიც კოორდინირებულია European Commission-ის მიერ. ეს პროცედურა მიზნად ისახავს შიდა ბაზარზე სავაჭრო ბარიერების თავიდან აცილებას და ითვალისწინებს წევრი სახელმწიფოების მიერ ახალი ტექნიკური რეგულაციების წინასწარ შეტყობინებასა და განხილვას. პროცესის ხანგრძლივობა წინასწარ ზუსტად განსაზღვრული არ არის და შეიძლება დამატებითი დრო დასჭირდეს შეფასებისა და კომენტარების ეტაპზე.
მეორე მიზეზი ის არის, რომ მთავრობას სურს მაღაზიებს მისცეს საკმარისი დრო არსებული მარაგების სრულად გასაყიდად.
ეს გადაწყვეტილება მნიშვნელოვანია ფართო საზოგადოებრივი ჯანმრთელობის კონტექსტში, რამეთუ არომატიზებული ნიკოტინის პროდუქტები წარმოადგენს სისტემურად დაგეგმილ სტრატეგიას თამბაქოს ინდუსტრიის მხრიდან.
არომატები — ხილი, ტკბილეული, მენთოლი — შემთხვევითი არ არის. ისინი მიზანმიმართულადაა შექმნილი იმისთვის, რომ: შეამციროს ნიკოტინის მიღების „ბარიერი“, გაზარდოს პროდუქტების მიმზიდველობა ახალგაზრდებში და
ჩამოაყალიბოს ახალი მომხმარებლების თაობა
ამ კონტექსტში, რეგულაცია წარმოადგენს არა მხოლოდ ბაზრის მართვის, არამედ მოსახლეობის ჯანმრთელობის დაცვის აუცილებელ ინსტრუმენტს
იმედია ერთ დღეს საქართველოც დაიწყებს საზოგადოებრივ ჯანმრთელობაზე ასეთივე ყურადღების მიქცევას და არ დარჩება იმქვეყნების რიცხვში სადაც პოლიტიკური გადაწყვეტილებები კვლავ მნიშვნელოვნად არის გავლენილი თამბაქოს ინდუსტრიის ინტერესებით. შესაბამისად რეგულაციების გაძლიერება ხშირად ყოვნდება ან სუსტდება, ხოლო არომატიზებული პროდუქტები რჩება ბაზარზე, მიუხედავად არსებული მტკიცებულებებისა მათი ზიანის შესახებ. საზოგადოებრივი ჯანმრთელობის პრიორიტეტები შეცვლილია მოკლევადიანი ეკონომიკური ან კომერციული ინტერესებით, რაც განსაკუთრებით აზიანებს ახალგაზრდებს და ზრდის ნიკოტინზე დამოკიდებულების გავრცელებას.
კომენტარები