ბაჩო ახალაია ახალი ბრალის წარდგენის მოლოდინშია – ექს-მაღალჩინოსანთან რუსთავის ციხეში წუთი-წუთზე უნდა შევიდნენ სუს-ის გამომძიებლები. როგორც ადვოკატი ანი ნადარეიშვილი ამბობს, მას მდინარაძის უწყებიდან რამდენიმე საათის წინ დაურეკეს და უთხრეს, რომ რუსთავის ციხეში აპირებდნენ შესვლას.
როგორი იქნება ბრალის შინაარსი ჯერ-ჯერობით უცნობია, თუმცა როგორც ანი ნადარეიშვილი ამბობს, ბაჩო ახალაიას ბრალს სუს-ის მიერ რამდენიმე დღის წინ აღძრულ საქმეზე წაუყენებენ.
საქმე ეხება ახალაიას სასამართლო პროცესზე გაკეთებულ განცხადებას, სადაც მან თქვა: „ივანიშვილი არის დასამხობი“.
სახელმწიფო უსაფრთხოების სამსახურის ინფორმაციით, გამოძიება დაწყებულია საქართველოს სისხლის სამართლის კოდექსის 317-ე მუხლით, რაც ხელისუფლების დამხობისკენ მოწოდებას გულისხმობს.
სუს-ი იძიებს ბაჩოს დახურულ სასამართლოზე გამოთქმული ფრაზის საქმეს, “ბიძინა ივანიშვილი უნდა დაემხოს” და სავარაუდოდ, ამ საქმესთან დაკავშირებით მთხოვეს მივსულიყავი, რადგან დღეს აპირებენ რომ ბრალი წაუყენონ. აბსურდი ხდება ყველასთან მიმართებაში, მარტო ბაჩოსთან მიმართებაში არა. განსაკუთრებით ბაჩოსთან მიმართებაში, თუნდაც იმიტომ, რაზეც ახლა ზის. საერთოდ არანაირი მტკიცებულება არ არის. მაინც წაუყენეს ბრალი და მაინც ციხეში ზის. ამიტომ არანაირი სიურპრიზი არ ყოფილა ეს. ჩვეულებრივი ავტორიტარული მმართველობის ფორმა არის, დიქტატურაში ვართ და რასაც უნდათ და როგორც უნდათ ისე აკეთებვენ, თორემ იურიდიულად როგორც შეიძლება მუხლი 317-ე შეაფასო, რომელიც არის საჯარო მოწოდებაზე და რომელიც არის კონსტიტუციური წყობილების დამხობაზე და ბიძინა ივანიშვილი არც კონსტიტუცია არ არის და არც სახელმწიფო არ არის და საერთოდ, არანაირი საჯარო მოხელეც არ არის. საჯარო მოწოდებად როგორ შეიძლება იყოს აღქმული დახურულ სასამართლოზე ნათქვამი?- განაცხადა ანი ნადარეიშვილმა.
ახალაია ასევე ბრალდებულია ე.წ. 4 ოქტომბრის საქმეზე – მას საქართველოს სისხლის სამართლის კოდექსის 225-ე მუხლის პირველი ნაწილით ედავებიან ჯგუფური ძალადობის ორგანიზებასა და ხელმძღვანელობას, რაც სასჯელის სახით 9 წლამდე თავისუფლების აღკვეთას ითვალისწინებს.
კომენტარები