ევროკომისიამ ქართული დიპლომატიური, სამსახურებრივი და ოფიციალური პასპორტების მფლობელებისთვის უვიზო მიმოსვლა ოფიციალურად შეაჩერა.
დოკუმენტში, რომელიც ევროკომისიის გვერდზე რამდენიმე წუთის წინ აიტვირთა, ხაზგასმით წერია, რომ კომისიამ ეს გადაწყვეტილება “ოცნების” ბოლოდოინდელი ქმედებების გამო მიიღო.
ევროკომისია აღნიშნავს, რომ ეს არის პირველი შემთხვევა, როდესაც გამოიყენება უვიზო მომოსვლის შეჩერების ახალი, გაძლიერებული მექანიზმი.
დღეს ევროკომისია აჩერებს უვიზო მიმოსვლას ქართული დიპლომატიური, სამსახურებრივი და ოფიციალური პასპორტების მფლობელებისთვის. შენგენის ზონაში ოფიციალური მიზნებისთვის შესვლისას მათ ახლა ვიზა უნდა ჰქონდეთ. ეს არის პირველი შემთხვევა, როდესაც ვიზების შეჩერების ახალი გაძლიერებული მექანიზმი გამოიყენება. ეს გადაწყვეტილება წევრი სახელმწიფოების მიერ დამტკიცებას მოჰყვა.
ვიზის შეჩერების მექანიზმი ამოქმედდა საქართველოს მიერ უვიზო რეჟიმის ფარგლებში აღებული ვალდებულებების განზრახ და მუდმივი დარღვევის საპასუხოდ დემოკრატიისა და ფუნდამენტური უფლებების ძირითად სფეროებში.
ვიზების ლიბერალიზაციის მიზანია ხალხთაშორისი კონტაქტების ხელშეწყობა და საერთო ღირებულებების, მათ შორის ადამიანის უფლებებისა და დემოკრატიული პრინციპების პატივისცემის, ხელშეწყობა. 2024 წლის ოქტომბრიდან საქართველოს ხელისუფლების ქმედებებმა, მათ შორის მომიტინგეების, ოპოზიციონერი პოლიტიკოსებისა და დამოუკიდებელი მედიის დარბევამ, უარყოფითად იმოქმედა საქართველოში არსებულ ვითარებაზე და გამოიწვია რამდენიმე ფუნდამენტური უფლებისა და საერთაშორისო სამართლებრივი სტანდარტის დარღვევა. საქართველომ ასევე უარი თქვა ევროკავშირის სავიზო პოლიტიკასთან შესაბამისობაში მოყვანაზე, რაც უვიზო მიმოსვლის შენარჩუნების აუცილებელი პირობაა. კომისია მიიჩნევს, რომ საქართველოს ხელისუფლების ქმედებები ძირს უთხრის იმ პრინციპებს, რომლებზეც დაფუძნებულია ვიზების ლიბერალიზაცია”, – წერია დოკუმენტში.
გარდა ამისა, კომისიამ დღეს მიიღო სახელმძღვანელო პრინციპები წევრი სახელმწიფოების საკონსულო ორგანოებისა და სასაზღვრო დაცვის წარმომადგენლებისთვის, რათა დაეხმაროს წევრ სახელმწიფოებს უვიზო მიმოსვლის შეჩერების გადაწყვეტილების ეფექტურად განხორციელებაში.
სახელმძღვანელო პრინციპები რეკომენდაციას უწევს ევროკავშირის გარე საზღვრებს გადაკვეთილი ყველა საქართველოს მოქალაქის გაძლიერებულ შემოწმებას: საქართველოს ხელისუფლების წარმომადგენლებმა უნდა გამოიყენონ თავიანთი დიპლომატიური ან სამსახურებრივი პასპორტი ევროკავშირში ოფიციალური და დიპლომატიური მიზნებისთვის მოგზაურობისას. ამის შეუსრულებლობამ შეიძლება გამოიწვიოს შესვლის აკრძალვის გაცემა.
წევრმა სახელმწიფოებმა ასევე უნდა უზრუნველყონ, რომ საქართველოს ყველა მოქალაქე შემოწმდეს ეროვნულ და ევროპულ მონაცემთა ბაზებთან, როგორიცაა სავიზო საინფორმაციო სისტემა, შენგენის საინფორმაციო სისტემა და სხვა საჯარო მონაცემთა ბაზები. შესვლის/გასვლის სისტემა, რომელიც ევროკავშირში გასული წლის ოქტომბრიდან თანდათანობით ინერგება, უსაფრთხოების დამატებითი დონის შემოწმებას ითვალისწინებს.
კომენტარები