თაღლითობა და ემიგრანტების ძარცვა ივანიშვილთან გადაღებული ფოტოთი – მედია

ფოტო – ტვ პირველი

ტვ პირველის ცნობით, მამაკაცი, რომელსაც ათობით ქართველი ემიგრანტი ბიძინა ივანიშვილის სახელით თაღლითობაში და დიდი ოდენობით თანხის მითვისებაში ადანაშაულებს, ხულოს საკრებულოს თავმჯდომარის მოქმედი მოადგილის შვილია. საუბარია ბადრი აბაშიძეზე.

ემიგრანტების თქმით, აბაშიძე ნდობაში შედიოდა ხელისუფლების ლიდერებთან – ივანიშვილთან, კობახიძესთან, მდინარაძესთან და ყაველაშვილთან გადაღებული ფოტოებით და ხალხს არწმუნებდა, თითქოს „სამშობლოში დაბრუნებაში“ დაეხმარებოდა. ამისთვის მათ ე.წ. „ლატარიაში“ მონაწილეობას სთავაზობდა: მონაწილეები თანხას დებდნენ იმ იმედით, რომ უფრო დიდ თანხას დაიბრუნებდნენ, თუმცა სქემა, დაზარალებულების მტკიცებით, პირამიდას ჰგავდა და საბოლოოდ ჩაიშალა, რის შედეგადაც ემიგრანტები თანხების გარეშე დარჩნენ.

დაზარალებულები აცხადებენ, რომ „ლატარიაში“ ჩარიცხვები 25 დოლარიდან იწყებოდა და 5000 დოლარამდე აღწევდა; დახურულ ჯგუფში დაახლოებით 13 ათასი ადამიანი იყო და თითოეულს ახალი წევრების მიყვანაც ევალებოდა. ორგანიზაციაში დასაქმებული ჟანა ლოგუა ამბობს, რომ მისი დათვლით, მითვისებული თანხა 2.5 მილიონ დოლარს აჭარბებს.

საქმეზე გამოძიება, როგორც იუწყებიან, ბოლო ერთი წელია მიმდინარეობს, თუმცა აბაშიძე კვლავ თავისუფლებაზეა, რის გამოც ემიგრანტებს ეჭვი აქვთ, რომ მას შესაძლოა მამის გავლენები იცავს.