შეხვედრა მშვიდობის საკითხებში სპეციალურ წარმომადგენელ სტივენ ვიტკოფს, ჯარედ კუშნერს, უკრაინის ეროვნული უსაფრთხოებისა და თავდაცვის საბჭოს მდივანს რუსტემ უმეროვსა და გენერალური შტაბის უფროსს, გენერალ ანდრეი გნატოვს შორის – მაიამიში გამართული შეხვედრის შემდეგ უკრაინისა და აშშ-ის დელეგაციები ერთობლივ განცხადებას ავრცელებენ.
„დღეს, ჯგუფმა ბოლო ორი კვირის განმავლობაში მეექვსე შეხვედრა გამართა. მდივანმა უმეროვმა კიდევ ერთხელ დაადასტურა, რომ უკრაინის პრიორიტეტი ისეთი მოგვარებაა, რომელიც უკრაინის დამოუკიდებლობისა და სუვერენიტეტის დაცვას, უკრაინელების უსაფრთხოებას და წარმატებული დემოკრატიული მომავლისთვის მყარ საფუძველს უზრუნველყოფს“, – ნათქვამია განცხადებაში.
მოლაპარაკებების მონაწილეებმა ამერიკულ და რუს მხარეებს შორის გამართული ბოლო შეხვედრის შედეგები განიხილეს.
მხარეებმა განიხილეს „მომავალი კეთილდღეობის დღის წესრიგი, რომელიც მიზნად ისახავს უკრაინის ომისშემდგომი აღდგენის, აშშ-უკრაინის ერთობლივი ეკონომიკური ინიციატივებისა და გრძელვადიანი აღდგენის პროექტების მხარდაჭერას“.
განცხადების თანახმად, მხარეები შეთანხმდნენ, რომ მოლაპარაკებები შაბათსაც გაგრძელდება.
„ამერიკული და უკრაინული მხარეები შეთანხმდნენ უსაფრთხოების მექანიზმების ჩარჩოზე და ხანგრძლივი მშვიდობის უზრუნველყოფისთვის საჭირო შეკავების შესაძლებლობები განიხილეს. ორივე მხარე შეთანხმდა, რომ ნებისმიერი სახის შეთანხმების მიღწევის მიზნით რეალური პროგრესი დამოკიდებულია რუსეთის მზადყოფნაზე, რომ ხანგრძლივი მშვიდობის მიმართ ნამდვილი ერთგულება გამოხატოს, მათ შორის, დეესკალაციისკენ და მკვლელობების შეწყვეტისკენ ნაბიჯების გადადგმით“, – აღნიშნულია განცხადებაში.
კომენტარები