კომპანია B.P. TRANS- ის მფლობელსა და ვანის საკრებულოში “ქართული ოცნების” დეპუტატს, ძებნაში მყოფ ბიჭიკო პაიკიძეს პროკურორის წერილის საფუძველზე პასპორტი გაუუქმდა. ამის შესახებ საქმის პროკურორმა ბექა ხუნაშვილმა განაცხადა.
მისი თქმით, გრიგოლ ლილუაშილის უახლოესი გარემოცვის წევრს პასპორტი მიმალვისთვის სჭირდებოდა.
“ეს პასპორტი მიმალვისთვის იყო განკუთვნილი და არა სასამართლოში გამოცხადებისთვის. სწორედ ამას შეუშალა მას საქმის მწარმოებელმა ორგანომ ხელი. ბიჭიკო პაიკიძეს შეუძლია მიმართოს მათ შორის, საელჩოს და მას ხელს შეუწყობენ საქართველოში დაბრუნებაში,” – განაცხადა ხუნაშვილმა.
ბიჭიკო პაიკიძის ადვოკატი, ირმა ჭკადუა კი, ტვ პირველთან, ამბობს:
„დიახ, მან ერთ-ერთ ქვეყანაში პასპორტი დაკარგა, ის საქართველოში იუსტიციის სახლს ელექტრონულად დაუკავშირდა, რათა ახალი პასპორტი აეღო, მან კანონით დადგენილი ყველა გზა გაიარა, როცა აღნიშნული პასპორტი მასთან მის მეუღლეს მიჰქონდა, ის საზღვარზე არ გაუშვეს და ეს პასპორტი ბატონი პროკურორის წერილით გაუქმებულია. ნებისმიერი ქვეყანა ვალდებულია მის მოქალაქეზე იზრუნოს, რა ტიპის დამნაშავეც არ უნდა იყოს ის. ეს არის უპრეცედენტო შემთხვევა, როცა ადამიანს საფრთხის ქვეშ აყენებენ. დიახ, ბრალდებას არ სურს ის აქ იყოს და ყველა კითხვას პასუხი გასცეს“.
კომენტარები