“გამარჯობის თქმა არ გაბედოთ. არაფერი მესაქმება იმ ხალხთან, ვისაც შეუძლია ფეხზე ეკიდოს დაჩაგრული ხალხი”– ვიკა ბუკია

ჟურნალისტი, ვიკა ბუკია, ჟურნალისტი ცოლ–ქმრის, ვასილ ივანოვ–ჩიქოვანის და მაიკო ბოკერიას დაჭერას ეხმაურება და წერს:

ვისაც მეგობრად ვთვლიდი, ვინც მეგონა, რომ თანაგრძნობის მნიშვნელობას ხვდებოდა, ის ზერელედ, უსიცოცხლოდ, ემპათიის გარეშე აცხადებს პატარა ბავშვების მშობლების დაკავებას. ერთი ნაგლეჯი სტატუსიც ვერ გაიმეტეს დაკავებული ჟურნალისტებისთვის. ყველაფერი ზუსტად ისეა, როგორც უნდა იყოს “ნულოვანი თანაგრძნობის” ქვეყანაში.

მზიასთვის ვერ გაიმეტეს სიტყვა, ვერც ანდროსთვის, ვერც ნინო დათაშვილისთვის. გამომცემელი კვარაცხელია „უსამშობლოა“, მხატვარი მარგიანიც, პოეტი რატიანი და ექიმი გაფრინდაშვილი, ყველა ის ადამიანი, ვინც წლების განმავლობაში ქმნიდა საუკეთესო ჟურნალებს, გადაცემებს, ტექსტებს, რეკლამებს, კურნავდა და ხატავდა, წერდა და აშენებდა – ყველა ციხეშია. მანამდე ამ ადამიანებს ცემდნენ და ურტყამდნენ, მაგრამ ფარისევლებისთვის მაინც ის ქალია ხულიგანი, რომელიც პროტესტის დროს პოლიციის მანქანაზე ავიდა. ადამიანების სახეებზე დახტოდნენ დაუსჯელი ტიტუშკები, მაგრამ ამათთვის მაინც ის უფრო დიდი დანაშაულია რკინაზე რომ დადის ქალი.

მებრალებით. ნეტა მარტო ჩუმად ყოფილიყავით. თქვენი საჩივრებით მიდიან ადამიანები ციხეში. ვინ ყოფილხართ, შემზარავებო. ქლესვით და ღრეჭვით ულოცავთ დაბადების დღეებს ულვაშებიან უფროსს, მორჩილების გულისამრევ რიტუალებს ატარებთ და არ გიჩნდებათ სურვილი თუნდაც მეასედი ემოცია გაიმეტოთ უსამართლოდ დაკავებული მოქალაქეებისთვის.

გულისამრევია თქვენი მაამებლობა რეჟიმისადმი.

გამარჯობის თქმა არ გაბედოთ. არაფერი მესაქმება იმ ხალხთან, ვისაც შეუძლია საკუთარ “ბულინგზე” ქონდეს მარტო რეაქცია და ფეხზე ეკიდოს დაჩაგრული ხალხი. “მეტი პოზიტივის” რომ გაიძახით მაშინ, როცა ციხები გატენილია უდანაშაულო ადამიანებით და ბოღმებს უწოდებთ თქვენი სიავის მამხილებლებს. არ გაბედოთ მოსალმება, საშიში ხალხი ხართ.