საქართველოში მოქმედი ევროკავშირის და პარტნიორი ქვეყნების საელჩოები ერთობლივ განცხადებას ავრცელებენ, სადაც კატეგორიულად უარყოფენ დეზინფორმაციასა და უსაფუძვლო ბრალდებებს დიპლომატიური მისიების საქმიანობაზე.
საუბარია ავსტრიის, ბელგიის, ბულგარეთის, ხორვატიის, ჩეხეთის, კვიპროსის, დანიის, ესტონეთის, ევროპის კავშირის, ფინეთის, საფრანგეთის, გერმანიის, საბერძნეთის, ირლანდიის, იტალიის, ლატვიის, ლიტვის, ლუქსემბურგის, ნიდერლანდების, ნორვეგიის, პოლონეთის, პორტუგალიის, რუმინეთის, სლოვენიის, ესპანეთის, შვედეთისა და გაერთიანებული სამეფოს საელჩოების სახელით გაკეთებულ განცხადებაზე.
დოკუმენტში ხაზგასმულია, რომ მსგავსი ბრალდებები საზოგადოებას აბნევს და საფრთხეს უქმნის დიპლომატების შესაძლებლობას, სრულფასოვნად შეასრულონ თავიანთი მოვალეობები.
საელჩოები განსაკუთრებულად მიუთითებენ, რომ დიპლომატების მუშაობის ნორმალური ნაწილი ხელისუფლების, ოპოზიციის, სამოქალაქო საზოგადოების და მოქალაქეებთან შეხვედრაა, რაც სრულ შესაბამისობაშია ვენის კონვენციასთან.
დიპლომატიური მისიები კიდევ ერთხელ მოუწოდებენ ყველა პოლიტიკურ ლიდერს, თავი შეიკავონ საზოგადოებაში დაყოფის მცდელობისგან და იმუშაონ არსებული დაძაბულობის დეესკალაციაზე.
ჩვენ მკაცრად ვუარყოფთ უსაფუძვლო და საზიანო ბრალდებებს, რომლებიც ზოგიერთ დიპლომატიურ მისიას საქართველოში წაუყენეს. მსგავსი დეზინფორმაცია აბნევს საზოგადოებას და აფერხებს ჩვენს დიპლომატიურ მისიებს თავიანთი მოვალეობების შესრულებაში.
დიპლომატებისთვის ჩვეულებრივი პრაქტიკაა სხვადასხვა აქტორთან — ხელისუფლებასთან, ოპოზიციასთან, სამოქალაქო საზოგადოებასთან და მოქალაქეებთან – შეხვედრა, რაც სრულად შეესაბამება ვენის კონვენციას. ჩვენ არ ვუჭერთ მხარს რომელიმე კონკრეტულ პოლიტიკურ პარტიას, ხოლო ბრალდებები, თითქოს ვუჭერთ მხარს ძალადობასა და ექსტრემიზმს, უბრალოდ სიმართლეს არ შეესაბამება. სინამდვილეში ჩვენ მოვუწოდებთ ყველა აქტორს, უარყოს და დაგმოს ძალადობის ნებისმიერი ფორმა.
ჩვენ ვთხოვთ ყველა პოლიტიკურ ლიდერს, თავი შეიკავონ დაყოფისკენ მიმავალი რიტორიკისგან და იმუშაონ დაძაბულობის დეესკალაციისკენ, – ნათქვამია განცხადებაში.
კომენტარები