“ჩვენ, რუსეთს ბოდიშს არ მოვუხდით… ვამაყობ, რომ ასეთი ვაჟკაცი შვილი გავზარდე” – კობა ხარჩილავას დედა

“ჩვენ რუსეთს ბოდიშს არ მოვუხდით, ჩვენ უნდა მოვუხადოთ ჩვენს გმირ შვილებს ბოდიში, რომ რუსებმა იმქვეყნად გაამგზავრეს, დიდება უკრაინას და დიდება საქართველოს!” – ასე გამოეხმაურა, აგვისტოს ომში დაღუპული, კობა ხარჩილავას დედა, დარეჯან ჩაჩიბაია რუსეთ-საქართველოს ომის 17 წლისთავს.

გმირის დედა “თაიმერთან” საუბრისას იმედს გამოთქვამს, რომ დაღუპული გმირების სისხლი ამაო არ იქნება.

“ჩვენ, რუსეთს ბოდიშს არ მოვუხდით, ჩვენ უნდა მოვუხადოთ ჩვენს გმირ შვილებს ბოდიში, რომ რუსებმა იმქვეყნად გაამგზავრეს, დიდება უკრაინას და დიდება საქართველოს! ყველა ვაჟკაცის ხსოვნა და მოგონება ყოფილიყოს, ვინც საქართველოს მთლიანობას შესწირა თავი და ამაო არ ყოფილიყოს ჩვენი შვილების სისხლი! ჩემმა შვილმა კონტრაქტს მოაწერა ხელი და 2008 წლის აგვისტოს მოხდა ის, რაც მოხდა. მე ვამაყობ იმით, რომ ასეთი ვაჟკაცი შვილი გავზარდე. მე ვარ გმირი შვილის დედა და მეამაყება ჩემი შვილი”, – აღნიშნა კობა ხარჩილავას დედამ.

შეგახსენებთ, რომ 170 სამხედრო მოსამსახურე, მათ შორის 23 ოფიცერი, 136 კაპრალ/სერჟანტი, 1 რიგითი, 9 რეზერვისტი და 1 სამოქალაქო პირი – ეს აგვისტოს ომის გმირების მონაცემებია, რომელიც საქართველოს უახლოეს ისტორიაში 17 წლის წინ ჩაიწერა.

5 დღიანმა ომმა ასევე შეიწირა 228 მშვიდობიანი მოქალაქე, გარდაიცვალა 14 პოლიციელი, დაიჭრა 1 747 ადამიანი.

საკუთარი საცხოვრებელი სახლი დატოვა 150 000-მდე ადამიანმა.

დღემდე დევნილის სტატუსს ატარებს 30 000-მდე პირი. განადგურდა 35 ათასი საცხოვრებელი სახლი. მიწასთან გასწორდა 53 ქართული სოფელი. ოკუპირებულია 5 ხეობა და 125 სოფელი.