წალენჯიხის მერის მოვალეობის შემსრულებელი, ივანე ბურდული მერიის ადმინისტრაციის წარმომადგენლებთან ერთად, დღეს, გამოცემა თაიმერის ცნობით, სოფელ ჯგალში “აგვისტოს ომში” დაღუპული გმირის, კობა ხარჩილავას საფლავზე იმყოფებოდა.
მათ პატივი მიაგეს რუსეთ-საქართველოს ომში დაღუპულ გმირთა ხსოვნას:
“დღეს 7 აგვისტოა და 17 წლის წინ სწორედ, ამ დღეს, რუსეთმა დაიწყო სამხედრო მოქმედებები საქართველოში. ის, შემოიჭრა ჩვენს ქვეყანაში და დაიკავა ჩვენი ტერიტორიები. ჩვენი სამხედროები, რა თქმა უნდა, მედგრად ებრძოდნენ მტერს და საკადრისი პასუხი გასცეს მათ. დაღუპულ გმირთა შორის იყო წალენჯიხელი კობა ხარჩილავაც, რომლის საფლავზეც დღეს მოვედით, რათა პატივი მივაგოთ მის ხსოვნას და მადლობა გადავუხადოთ მის მშობლებს იმისათვის, რომ ასეთი ადამიანი აღზარდეს”, – განაცხადა წალენჯიხის მერის მოვალეობის შემსრულებელმა.
ივანე ბურდულმა, რუსეთ-უკრაინის ომში დაღუპული წალენჯიხელებიც გაიხსენა და აღნიშნა, რომ წალენჯიხა გახდა მაგალითი იმისა, თუ როგორი უნდა იყოს ქართველი.
“ძალიან მნიშვნელოვანია ის, რომ მრავალი წალენჯიხელი ემსხვერპლა, ასევე, რუსეთ-უკრაინის ომს და წალენჯიხა მაგალითია, თუ როგორი უნდა იყოს ქართველი ადამიანი, რომელსაც უყვარს თავისი სამშობლო, თავისი ქვეყანა და არჩევს მტერსა და მოყვარეს. ამ ადამიანებმა იციან ვინ არის ჩვენი ქვეყნის მტერი ,ვინ არის ქვეყნის მოყვარე და შესაბამისად უმკლავდებიან ყველა მათგანს. დიდება საქართველოს, დიდება გმირებს და მადლობა მათ თავი რომ შესწირეს ჩვენს ქვეყანას”, – დასძინა მან.
შეგახსენებთ, 170 სამხედრო მოსამსახურე, მათ შორის 23 ოფიცერი, 136 კაპრალ/სერჟანტი, 1 რიგითი, 9 რეზერვისტი და 1 სამოქალაქო პირი – ეს აგვისტოს ომის გმირების მონაცემებია, რომელიც საქართველოს უახლოეს ისტორიაში 17 წლის წინ ჩაიწერა.
5 დღიანმა ომმა ასევე შეიწირა 228 მშვიდობიანი მოქალაქე, გარდაიცვალა 14 პოლიციელი, დაიჭრა 1 747 ადამიანი.
საკუთარი საცხოვრებელი სახლი დატოვა 150 000-მდე ადამიანმა.
დღემდე დევნილის სტატუსს ატარებს 30 000-მდე პირი. განადგურდა 35 ათასი საცხოვრებელი სახლი. მიწასთან გასწორდა 53 ქართული სოფელი. ოკუპირებულია 5 ხეობა და 125 სოფელი.
“ჩვენ, რუსეთს ბოდიშს არ მოვუხდით… ვამაყობ, რომ ასეთი ვაჟკაცი შვილი გავზარდე” – კობა ხარჩილავას დედა
კომენტარები