სინდისის 11 პატიმრის სასამართლო პროცესზე, დაკავებულების, გურამ მირცხულავას და ჯანო არჩაიას უფლრბადამცველმა, ომარ ფურცელაძემ საქმეში “ახალი ალტერნატივის”, დამოუკიდებელი სასამართლო ექსპერტიზის დასკვნა წარმოადგინა, სადაც წერია, რომ საქმეში წარმოდგენილი ვიდეო ჩანაწერი დამონტაჟებულია, ხოლო საგნის იდენტიფიცირება კი შეუძლებელი.
ალტერნატიული ექსპერტიზის დასკვნა:
წარმოდგენილი ვიდეო/აუდიო ჩანაწერი სახელწოდებით “ვიდეო” მიღებულია სხვადასხვა სახის მონტაჟის შედეგად.
1.1 ვიდეოჩანაწერში მონტაჟში პირველი ნიშანი წარმოადგენს ორი განსხვავებულ ვიდეო ფრაგმენტის შეერთებას. მონტაჟის მეორე ნიშანს წარმოადგენს ვიდეოჩანაწერის ჭრა, სადაც ვიდეოჩანაწერს აკლია გარკვეული ფრაგმენტები.
1.2 წარმოდგენილი ვიდეოჩანაწერით, შეუძლებელია ჩანაწერზე ასახული პიროვნების – გამოძიების ვერსიით – გურამ მირცხულავას (აცვია შავი ფერის ქურთუკი, მოცისფრო ფერის მაისური, თავზე ახურავს შავი ფერის ნაქსოვი ქუდი და ზურგზე დაკიდებული აქვს ზურგჩანთა, ხელში უჭირავს საქართველოს დროშა) მიერ დახრის შემდეგ ხელში აღებული საგნის იდენტიფიცირება.
გურამ მირცხულავას და ჯანო არჩაიას ადვოკატის, ომარ ფურცელაძის განცხადებით, ალტერნატიულმა ექსპერტიზის დასკვნამ დაცვის მხარეს საშუალება მისცა ეთქვა, რომ ბრალში აღწერილი გურამ მირცხულავას ქმედება ვერ დადასტურდება. ვიდეო მტკიცებულება კი რომელიც საქმეში დევს, “აწყობილი სამი ერთმანეთისგან დამოუკიდებელი ეპიზოდით”.
პოლიციის მიმართულებით ისროლა მძიმე საგანი – ექსპერტიზამ თქვა, რომ შეუძლებელია ამის დადგენა. ეს საგანი იყო თუ არა მძიმე და რაც გადაწყვეტით დაადგინა არის ის, რომ გასროლა არ მომხდარა პოლიციის მიმართულებით. ამის მადასტურებელ მტკიცებულებად თუ ვინმე რაიმეს უთითებდა და უთითებდა ვიდეოზე, ეს ვიდეო არის დამონტაჟებული და აწყობილი სამი ერთმანეთისგან დამოუკიდებელი ეპიზოდით.
ახლა ამის შეჯამებით ვიღებთ ესეთ რამეს, რომ გური მირცხულავას ქმედება აღწერილი ბრალში ფაქტობრივად ვერ დადასტურდება კი არა, ჩვენ თამამად შეგვიძლია ვთქვათ, რომ გამოირიცხა უკვე,” – განაცხადა ომარ ფურცელაძემ.
ამასთან ადვოკატმა აღნიშნა, რომ ექსპერტიზამ გადაწყვეტით თქვა, რომ “საგანი, რომელიც სავარაუდოდ ჯანო არჩაიამ ხელში აიღო, ჯერ გასროლილი იყო პოლიციის მიმართულებით” და ექსპერტიზაში აღწერილი არ არის პოლიციის მიმართ თავდასხმა.
ამასთან უფლებადამცველის თქმით, ექსპერტმა ჯანო არჩაიას საგნის დავარდნის ლოკაცია განსაზღვრა და თქვა, რომ “ის დავარდნილია პოლიციისგან მოშორებით”.
ექსპერტიზამ ასევე გადაწყვეტით თქვა ის, რომ საგანი, რომელიც სავარაუდოდ ჯანო არჩაიამ ხელში აიღო, ჯერ გასროლილი იყო პოლიციის მიმართულებით. ასევე ამ ექსპერტიზის დასკვნით, ექსპერტიზამ დაადგინა ის, რომ რეალურად ორივე დაპირისპირებული მხარე, სადაც ერთი არის პოლიციის ეკიპირებით წარმოდგენილი და მეორე არიან ქციის მონაწილეები, გარკვეული დროის ინტერვალში, მთელი ვიდეოს განმავლობაში, რაც წარმოდგენილია საგნებს ესვრიან ერთმანეთს. არავითარ შემთხვევაში აქ აღწერილი არ არის პოლიციის მიმართ თავდასხმა. აღწერილია ორმხრივი გაცვლა საგნების.
ახლად გამოვლენილი გარემოება, რაც არცერთ ექსპერტიზაში და არცერთი საქმის მასალაში ნახსენები არ იყო დღევანდელ დღემდე და დღეს გაჩნდა პირველად არის ის, რომ ჯანო არჩაიას საგნის დავარდნის ლოკაცია განსაზღვრა ექსპერტმა და თქვა, რომ ის დავარდნილია პოლიციისგან მოშორებით. შეუძლებელია ამ საგნის რაობის დადგენა, მაგრამ ასვალტზე დავარდნის შემდეგ ეს საგანი, ძალიან მცირე ზომის საგანი კან ბრუნდება და დაღმართზე გორავს. იმდენად მსუბუქი იყო, რომ დაცემის შემდეგ დაღმართზე უბრალოდ დაგორდა,” – განაცხადა ომარ ფურცელაძემ.
ცნობისთვის, ექსპერტიზა 30 ივლისით თარიღდება, ის მ. ტოკლიკიშვილმა ჩაატარა.
ამასთან, დღეს, სინდისის 11 პატიმრის პროცესზე ადვოკატებმა აღკვეთი ღონისძიების სახის გადასინჯვაზე შუამდგომლობა დააყენეს.
შეგახსენებთ, რომ დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კიკნაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.
აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.
კომენტარები