ნინო დათაშვილს მედიკოსების დახმარება და მრავალპროფილურ კლინიკაში გადაყვანა სჭირდება. ადვოკატის ინფორმაციით, დაპატიმრებული მასწავლებლის ჯანმრთელობის მდგომარეობა დამძიმდა.
დამირეკა ნინომ საპატიმროდან და მითხრა, რომ მისი ჯანმრთელობის მდგომარეობა გაუარესდა. ხერხემლის პრობლემა აქვს ნინოს და ამ წუთას, როგორც მითხრა, პრობლემის გამო ერთი ფეხი აქვს გაშეშებული, ვერ ახერხებს გადაადგილებას და ითხოვს ექიმს უკვე რამდენი ხანია ითხოვს, რომ მასთან შევიდეს ექიმი.
მისი მკურნალი ექიმი, ნევროლოგი, რომელთანაც ის მუდმივად გადიოდა კონსულტაციებს, უნდა რომ მან გაუწიოს ისევ კონსულტაცია, ან იმ კლინიკამ რომელშიც მკურნალობდა ხოლმე.
სახალხო დამცველის აპარატს მიმართეს წერილით ნინოს ადვოკატებმა,” – განაცხადა ნინო დათაშვილის ახლობელმა.
ადვოკატის განცხადებით, სასამართლოსა და პროკურატურას დაკავების დროს უკვე ჰქონდათ ნინო დათაშვილის ჯანმრთელობის პრობლემების შესახებ ინფორმაცია, თუმცა არ გაითვალისწინეს.
“ნინო, დაკავების პროცესში უკვე ცნობილი იყო პროკურატურისთვისაც და სასამართლოსთვისაც, რომელმაც შეუფარდა პატიმრობა, რომ ნინოს ჰქონდა ჯანმრთელობის საჭიროებები, სჭირდებოდა გადაუდებელი კვლევები, მას ჰქონდა ოპერაცია გაკეთებული ხერხემალზე, კვლავ ჰქონდა ქირურგიული ჩარევის საჭიროება. ეს ყველაფერი ჩვენ გავაჟღერეთ სამედიცინო მტკიცებულებებით, დადასტურებულად სასამართლო პროცესზე, თუმცა სასამართლომ არ გაითვალისწინა ეს, როდესაც ნინოს უფარდებდა პატიმრობას.
სააპელაციოში როდესაც გავასაჩივრეთ სასამართლოს გადაწყვეტილება პატიმრობა, ვუთითებდით, რომ ციხის პირობებში ნინოს ჯანმრთელობის მდგომარეობა დამძიმდებოდა, რადგან, ბუნებრივია, რომ როცა ადამიანს აქვს ჯანმრთელობის საჭიროება და არ ეწოდება შესაბამისი სერვისი, მისი ჯანმრთელობის მდგომარეობა უარესდება,” – განაცხადა ადვოკატმა.
ომბუდსმენის აპარატის წარმომადგენლება ნინო დათაშვილი პენიტენციურ დაწესებულებაში ორჯერ მოინახულეს. მათი ინფორმაციით, პენიტენციურის სამედიცინო განყოფილება, შსს და პროკურატურა საქმის კურსში არიან, თუმცა, უცნობია რა რეაგირება მოჰყვა მათ გაფრთხილებას.
27 ივნისს, 11 და 16 ივლისს, სახალხო დამცველის რწმუნებულებმა N5 პენიტენციურ დაწესებულებაში მოთავსებული ნინო დათაშვილი მოინახულეს.
შეხვედრისას ნინო დათაშვილმა რწმუნებულებთან სხვადასხვა საკითხზე ისაუბრა, რის შესახებაც, სახალხო დამცველის აპარატმა, რეაგირების მიზნით, საქართველოს გენერალურ პროკურატურას, შინაგან საქმეთა სამინისტროსა და სპეციალური პენიტენციური სამსახურის სამედიცინო დეპარტამენტს მიმართა.
ცნობისთვის, ნინო დათაშვილი 20 ივნისს დააკავეს. მასწავლებელს სისხლის სამართლის კოდექსის 353-ე მუხლის მე-3 ნაწილის დარღვევას ედავებიან, რაც საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარასა და ძალადობას გულისხმობს.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
კომენტარები