ჟურნალისტი, პუბლიკას დამფუძნებელი, ზურაბ ვარდიაშვილი:
ეთერ თურაძის ჩვენების პარალელურად, მზია, პირველად ამ მრავალთვიანი პროცესის განმავლობაში, დარბაზისკენ ზურგით ტრიალდება, მის სახეს ვერ ვხედავ, მაგრამ მხრების ცახცახზე ვხვდები, რომ ტირის.
ეს რამდენიმე წუთი გრძელდება. როცა ტრიალდება ხელში ცრემლებით სველი ხელსახოცი უჭირავს. თუმცა ეს არაა ტირილი სისუსტის გამო. ცოტა გვიან მოვყვები, რამ გამოიწვია მისი ემოცია. ტირის დარბაზიც.
ეთერი ყვება, თუ რატომ გადაწყვიტა აქციაზე მისვლა. ეს გამოიწვია, როგორც ეთერი ამბობს, ციალა ქათამიძისა და გოდერძი ფრანგიშვილის დაკავებამ. ფრანგიშვილი მისი თანამშრომლის ძმაა, რომელსაც თირკმელი აქვს გადანერგილი. „როცა წარმოვიდგინე, რა საფრთხე შეიძლებოდა შექმნოდა მის ჯანმრთელობას, მის ცემას და არასათანადო მოპყრობას, მივედი ადგილზე.“
აქ თურაძე ბოდიშს უხდის მზია ამაღლობელს და იხსენებს მისი ოჯახის უმძიმეს ტრაგედიას. რამდენიმე წლით ადრე მზიას ოჯახში გარდაიცვალა 23 წლის გოგონა, რომელსაც ასევე თირკმელი ჰქონდა გადანერგილი.
„ეს იყო უდიდესი დარტყმა მზიასთვის. მზია ყოველთვის განსაკუთრებულად ზრუნავდა გოდერძიზე. ვიცოდი, რომ მისი დაკავება მზიასთვის იქნებოდა ემოციურად უმძიმესი გამოცდა.“
ამ ამბის გახსენებას მოჰყვა სწორედ მზიას ცრემლები.
კომენტარები