“დანოსებით” დარბიან სკოლაში – დღე არ გავა, არ მომივიდეს შემაძრწუნებელი ინფორმაცია, თუ როგორ ატერორებს ხელმძღვანელობა მასწავლებლებს” – გიორგი ჩუბინიძე

ისტორიკოსი, გიორგი ჩუბინიძე:

დღე არ გავა ჩემი, გლდანის 173-ე სკოლიდან, სადაც 12 წელი გავატარე და სადაც უამრავი მეგობარი მყავს (ძველი, ახალი, მოსწავლე, მასწავლებელი, მშობელი და ა.შ.), არ მომივიდეს შემაძრწუნებელი ინფორმაცია, თუ როგორ ატერორებს ხელმძღვანელობა მასწავლებლებს.

ყოველდღიურად ისმენენ მასწავლებლები ხელმძღვანელთა მუქარებს. პოლიტიკური მოტივით, ვისაც კრიტიკული, თავისუფალი აზრი გააჩნია ან ოჯახის წევრი ჰყავს კრიტიკული აზრის და ან აქციებზე არიან ნამყოფები, ყველას მიმართ მიმდინარეობს ჩვეულებრივი, მიზანმიმართული რეპრესიები.

,,დანოსებით” დარბიან სკოლაში თანამშრომლების ნაწილი, ერთმანეთის ჩაშვება-დაბეზღებები მიდის და ეს ყველაფერი იმის ფონზე, რა დარღვევებზეც სკოლაში საუბრობენ.

ვერ ვარ უფრო კატეგორიული და არ ვიტყვი კონკრეტულ ფაქტებს, მაგრამ იძულებული ვარ ვიყო ღია, თუ რა სახის ბრალდებები ისმის –

მასწავლებლების დაშინება პოლიტიკური საბაბით;

სკოლის ფართების უკანონო გაქირავება;

რეპეტიტორი მასწავლებლების წილში ჩადგომა (ადრე რომ გავიდნენ სკოლიდან);

ნეპოტიზმი სკოლაში;

ტერორი;

მიყურადება;

პირადი კონტროლი (ვინ სად რას დაწერს, რა ლაიქს და კომენტარს დაწერს და ა.შ.).

ეს ყველაფერი თუ რეალობაა და ამ სკოლის თანამშრომლები მართალს ამბობენ, უმძიმესი დანაშაულია.

და თუ ვინმე იტყუება ესეც მძიმე დანაშაულია, მაგრამ ვწერ საჯაროდ, რადგან ჩემთვის უახლოესმა ადამიანებმა უკვე მერამდენედ პირადად მთხოვეს დახმარება რომ ღიად ვისაუბრო ამ პრობლემებზე, რადგან ეს ყოფა მათთვის გაუსაძლისია.

თუ რამეში ვცდები ბოდიშსაც მოვიხდი და თუ არ ვცდები, ყველა სახელმწიფო უწყებისგან მოვითხოვ რეაგირებას. ყველა მშობლისგან მოვითხოვ რეაგირებას, პოლიტიკური გემოვნების მიუხედავად, რადგან ბავშვები უნდა იზრდებოდნენ თავისუფალ, კრიტიკულ, დემოკრატიულ გარემოში და არა დაშინებული მასწავლებლების გარემოცვაში.

მეც მიმუშავია მასწავლებლად, ვიცი რა არის მოსწავლე-მასწავლებლის ურთიერთობა, თანაც ამ სკოლის აღზრდილი ვარ და ზუსტად ვიცი და ვიაზრებ ამ ყველაფრის მნიშვნელობას!

გთხოვთ, ასევე მედიას, ჩემს მეგობარ ჟურნალისტებს. მიდით ადგილზე და იქვე გაარკვიეთ სიტუაცია.