„ეს არის ყალბი კომისია! ეს არის ჩემი პოლიტიკური დევნის გაგრძელება“ – ბადრი ჯაფარიძე

„ლელოს“ ლიდერმა ბადრი ჯაფარიძემ სასამართლო პროცესზე განაცხადა:

„პოლიტიკური დევნა, რომელიც მიმდინარეობს ჩემს მიმართ, ეს არ არის სისხლის სამართლის საქმე, ეს არის პოლიტიკური დევნის საქმეები. 2003-2012 წლის თანამდებობის პირების საქმეების გამოძიებისთვის შეიქმნა თითქოსდა ეს კომისია – არანაირი თანამდებობა მე არ მქონია ამ პერიოდში საერთოდ. შესაბამისად, მეორე, რაც აქ აღნიშნა უკვე ბატონმა ზვიადმა, კომისიის მინიმუმ 50% უნდა შედგებოდეს ოპოზიციის წევრებისგან. ეს ადამიანები, მოვიკითხე დღეს, დამაინტერესა, ვინ არიან: ოპოზიცია არის მაჭარაშვილი და სუბარი. ეს ხომ დაცინვაა სამართალზეც, დაცინვაა კანონზეც.

გარდა ამისა, რომ ჩათვალეს, რომ ოპოზიცია არის მაჭარაშვილი და სუბარი ქართული ოცნების თურმე, გარდა ამისა, კიდევ ორი ადგილი მაინც ვერ შეავსეს იმიტომ, რომ იქ გახარიას პარტიამ არ მიავლინა თავისი წარმომადგენლები, შესაბამისად, ვერ შედგა კომისია. […] ეს არის ყალბი კომისია.

ყალბმა კომისიამ გადაწყვიტა ჩემი პოლიტიკური დევნისთვის დავებარებინე ისეთ გამოძიებაზე, რომელთანაც არანაირი კავშირი არ მაქვს, არანაირი თანამდებობა არ მქონია მაგ პერიოდშიც, შესაბამისად, არანაირი საქმეები და არანაირი კავშირი არ მქონია იმ ქმედებებთან, რომელიც დეკლარირებულია წინა ხელისუფლებაზე. ცხადია, რომ ეს იყო ერთადერთი მიზნით გაკეთებული, ჩემი ე.წ. დაბარება – ჩემი დისკრედიტაციის, ჩემი პოლიტიკური დევნის გაგრძელების იმიტომ, რომ ეს არ არის პირველი ჩემს მიმართ განხორციელებული ღია დევნა ქართული ოცნების მხრიდან. მანამდე მოიგონეს ე.წ. ფულის გათეთრების საქმე, რომელიც არის სრულიად შეთითხნილი, შეთხზული და ამაზე არსებობს არაერთი რეზოლუციაც კი ევროპარლამენტის, რომელმაც პირდაპირ უწოდა საქმეებს პოლიტიკური დევნის კლასიკური მაგალითი, ახლაც, ეს არის პოლიტიკური დევნის კლასიკური მაგალითი. ამიტომ, ვფიქრობ, რომ თქვენ შესაძლებელია, შეწყვიტოთ ეს პოლიტიკური დევნა იმიტომ, რომ მას არანაირი კავშირი (ამ სისხლის სამართლის საქმეს) არ აქვს კანონთან, არც სამართლიანობასთან, არც საგამოძიებო კომისიასთან. ეს არის პირდაპირი, ჩემს წინააღმდეგ, მამუკა ხაზარაძის წინააღმდეგ მიმდინარე პოლიტიკური დევნის გაგრძელება.

გარდა ამისა, ის მოსაწვევი, რომელიც მთელი რიგი დარღვევებით, იგნორირებით იქნა შედგენილი, ის მე არ მიმიღეა. ეს პროკურორებმაც ნახეს, რომ ის “სიგნალით” მიღებული შეტყობინებები მე არ გამიხსნია იმიტომ, რომ არ ვხსნი უცხო ადამიანებისგან მიღებულ შეტყობინებებს. […]

უკანონო კომისიის მიერ უკანონო მოწვევა არ მიმიღია. მიუხედავად ამისა, ჩემს წინააღმდეგ აღძრულია სისხლის სამართლის საქმე და არსებით განხილვაში ვართ ახლა, დღეს თქვენთან. გარდა ამისა, მე მაინც კიდევ მინდა დავადასტურო, რომ მიმეღო მე ეს მოწვევა, რა თქმა უნდა, მე ვიხელმძღვანელებდი ჩემი რწმენით და კანონის მოთხოვნით, რომ ეს კომისია არის უკანონო და მისი ე.წ. მოწვევა არის უკანონო, მაგრამ მე ეს მოწვევა არ მიმიღია.“