1 380 000 ლარი – ეს ფული მხოლოდ ერთ თვეში “ქართულმა ოცნებამ“ ერთგული დამფინანსებლებისგან მიიღო. როგორც ირკვევა, აპრილის თვეში რამდენიმე კონკრეტულმა კომპანიამ, მათმა მეწილეებმა და ამ მეწილეების ოჯახის წევრებმა, ერთდროულად გადაწყვიტეს, რომ მმართველი პარტიისთვის თანხა ეჩუქებინათ, – ინფორმაციას ,,ტვ პირველი” ავრცელებს.
შემოწირულებები ძირითადად ერთნაირია და 50-იდან 60 ათას ლარამდე მერყეობს. შემწირველებს შორის არიან ლილო მოლის მეწილეები, ასევე ვაგზლის ბაზრობის მფლობელები და მათი ოჯახის წევრები, ასევე ბაგრატიონების გვარის წარმომადგენლები, ღვინის კომპანია “ბოლერო ენდ კომპანი“ და კიდევ რამდენიმე სხვა ჯგუფი.
მკვლევარები მიიჩნევენ, რომ სწორედ ეს არის სისტემური კორუფცია, როდესაც ერთი კონკრეტული ჯგუფი წყვეტს, შესწიროს “ქართულ ოცნებას“ ფული.
მათივე თქმით, “ეს ხდება ან იძულებით, ან ხდება კონკრეტული სარგებლის მიღების იმედით და სწორედ ასე მუშაობს კორუფციული სისტემა, რომელიც მმართველმა გუნდმა ააწყო.“
ტრადიციული საურათი გვაქვს, ესენი არიან მსხვილი ბიზნეს ჯგუფები, რომლებიც წირავენ “ქართულ ოცნებას“ მსხვილ თანხებს, ამ ადამიანებს, წლების განმავლობაში, მილიონზე მეტი აქვთ შეწირული ცალ-ცალკე „ოცნებისთვის“, თუ შევისწავლით მათ ბიზნესსაქმიანობებს, ვნახავთ, რომ სახელმწიფო ბიუჯეტიდან კიდევ უფრო მეტი აქვთ მიღებული, სხვადასხვა სახით, ეს იქნება სუბსიდიები, რომლებიც გაიცემა სახელმწიფო ბიუჯეტიდან, თუ ეს იქნება სახელმწიფო შესყიდვები. ასევე პრივატიზაციით მიღებული ქონება, აწარმოე საქართველოში პროგრამა და ა.შ. წლებია, ვსაუბრობთ, რომ აქ იკვეთება სისტემური სახის კორუფცია“,- ამბობს“საერტაშორისო გამჭვირვალობის“ იურისტი, გიგი ჩიხლაძე.
ოპოზიცია არ გამორიცხავს, რომ ბიზნესმენები ფულს “ოცნებას“ შიშის გამო სწირავენ და თუ თანხას არ გაიღებენ, პრობლემები შეექმნებათ.
ისინი დარწმუნებულები არიან, რომ ეს სქემა ორი მიმართულებით მუშაობს- ერთი, შეთანხმების საფუძველზე, რომ შემდეგ სარგებელი მიიღოს ბიზნესმა და მეორე, პარტიის მხრიდან ზეწოლის ფორმები.
ლილო მოლის მესაკუთრეებს ერთად მოუნდათ ყველას, რომ თანხა შესწირონ, ასევე ვაგზლის მოედანზე არსებულ ბაზრობის მესაკუთრეებს, ბაგრატიონებს, ერთად მოუნდათ შემოწირულობები გააკეთონ, ეს არის ორგანიზებული სახე, ესენი არიან “ქართული ოცნების“ სისტემატური დამფინანსებლები, ეს იმას ნიშნავს, რომ ეს ადამიანები სარგებელს იღებენ “ოცნებიდან“. ერთი მაგალითი შეიძლება მოვიყვანოთ ის, რომ ლილო მოლის ერთ-ერთი მეწილე, პარალელურდ, გზების კომპანიაშიცაა მეწილე, რომელიც მერიის ტენდერებს იგებს-ამბობს ბესიკ დონაძე.
ამ ფულის რეალური რეალური წარმომავლობა არის ის შავი სალარო, რომელიც ივსება ბიუჯეტიდან მოპარული თანხებით, არავის ეგონოს, რომ ბიძინა ივანიშვილი პირადა აფინანსებს “ოცნების“ ხელისუფლებაში ყოფნას და მისი პარტია დიდი ხანია უკვე ფინანსდება ბიუჯეტიდან ნაძარცვი თანხებით, შესაბამისად, ხალხმა უნდა იცოდეს, რომ ყველა ამ შემოწირულობის უკან კონკრეტული კორუფციული გარიგება დგას, რომელიც პარავს ხალხს ფულს და დაკავებულია ქართული სახელმწიფოსათვის ძირის გამოთხრით,- აცხადებს საბა ბუაძე.
მკვლევრები ითხოვენ, გამოძიებული იქნას, თუ როგორ ხდება თანხების მობილიზება პარტიის ყულაბაში.
კომენტარები