“რუსეთის მცდელობა რუმინეთშიც ჩავარდა” – გიორგი კობერიძე

საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:

რუმინეთში საპრეზიდენტო არჩევნების მეორე ტური დასრულდა. 95% ხმები დათვლილია და პირველადი ოფიციალური შედეგით, 8%-ით ანუ დაახლოებით 800 ათასი ხმით ლიდერობს პროევროპელი ნიკუშორ დანი. როგორც ჩანს ოფიციალური შედეგები ეგზიტპოლის შედეგებს ემთხვევა, რომელშიც ნიკუშორ დანი 54%-ით ლიდერობდა. რუსეთის მცდელობა რუმინეთშიც ჩავარდა. არადა ანტიუკრაინულად განწყობილი და პრორუსული ძალების მხრიდან მხარდაჭერილი ჯორჯ სიმიონი პირველ ტურში ნიკუშორ დანის თითქმის 20%-ით უსწრებდა.

საინტერესო რამდენიმე დეტალია: ჯორჯ სიმიონის მხარს უჭერდა ვიქტორ ორბანიც, რომლის ამ ქმედებამაც ორაზროვნება გამოიწვია როგორც უნგრეთში ისე რუმინეთში. თუ რატომ, უნდა შევხედოთ კონტექსტს და გავითვალისწინოთ, რომ თანამედროვე რეალობაში არსებული რუმინული და უნგრული ნაციონალიზმი ერთმანეთთან თითქმის შეუთავსებელია: ორბანის მხარდამჭერი ნაციონალისტები რუმინეთის ტრანსილვანიაში მცხოვრები უნგრელების სხვადასხვაგვარი თვითგამორკვევის უფლებას ითხოვენ ხოლმე. ეს კი რუმინელი ნაციონალისტების გაღიზიანების საგანი არაერთხელ გამხდარა. სიმიონი თავს ნაციონალისტად წარადგენს ხოლმე. ამასთან, წარსულში ამავე სიმიონის რიტორიკა უნგრელების წინააღმდეგ არაერთხელ იყო მიმართული. აი ამ ფონზე კი ორბანის მხარდაჭერა არც რუმინელებს გაუხარდათ და არც უნგრეთში შეხვდნენ პოზიტიურად. ორბანს თავისი ნაციონალისტები დაუპირისპირდნენ, ხოლო სიმიონის მხარდამჭერებში დაბნეულობა გააჩინა – რამდენად კარგია მხარი დაგიჭიროს იმ ლიდერმა, რომელიც შენი ქვეყნისადმი მთლად კარგად არაა განწყობილი?!

ამასთან, ამ მიმდინარე პოლიტიკური სკანდალის ფონზე, ტრანსილვანიელმა უნგრელებმა ვის დაუჭირეს მხარი ძალიან საინტერესოა.

სიმიონის მხარდამჭერად რუსეთიც გვევლინება. კრემლისათვის სიმიონის ყველა შეხედულება შეიძლება სულაც არ არის მისაღები, მაგრამ რუმინეთის შიგნით არეულობისათვის და უკრაინისადმი დახმარების შეზღუდვის მოლოდინში, მისი კანდიდატურა ყველაზე სასურველად ჩანდა, გეოგრესკუს შემდეგ, რომელსაც არჩევნებში მონაწილეობა აეკრძალა.

რუსეთმა რუმინეთის შიგნით ქაოსის დასათესად დიდი საინფორმაციო კამპანია და პროპაგანდა აწარმოა და სერიოზული რესურსებიც გაიღო. ახლა დანის გამარჯვებით მისი ეს სწრაფვაც ჩავარდება.