რამდენიმე ევროპელმა დიპლომატიურმა წყარომ ბრიუსელში European Pravda-ს უთხრა, რომ უნგრეთი რუსეთის წინააღმდეგ ევროკავშირის მე-17 სანქციების პაკეტის მიღებას არ ეწინააღმდეგება და ის შესაძლოა ოფიციალურად 2025 წლის მაისშივე დამტკიცდეს.
ევროპელმა დიპლომატებმა გამოცემას განუცხადეს, რომ უნგრეთის ვეტოს არარსებობა საშუალებას იძლევა, რომ რუსეთის ფედერაციის წინააღმდეგ სანქციათა მე-17 პაკეტი სწრაფად იქნეს მიღებული.
ევროკავშირის ერთ-ერთი წამყვანი წევრი ქვეყნის დიპლომატმა გამოცემას უთხრა, რომ 6 მაისს გამართულ შეხვედრაზე ევროკომისიამ რუსეთის წინააღმდეგ სანქციათა მე-17 პაკეტის პროექტი წარადგინა. დიპლომატის თქმით, განხილვა საკმაოდ კონსტრუქციული იყო და ჩანდა, რომ უნგრეთი პაკეტის წინააღმდეგი არ იყო.
დიპლომატმა უნგრეთის ნეიტრალური პოზიცია იმით ახსნა, რომ პაკეტი “ძირითადად ეხება იურიდიულ პირებს, რომლებიც მათთვის პრობლემატური არ არის”.
ინფორმაცია გამოცემას ორმა სხვა დიპლომატმაც დაადასტურა.
ერთმა წყარომ თქვა, რომ უნგრეთის ამჟამინდელი პოზიცია აუცილებლად არ ნიშნავს იმას, რომ ის იმავეს მოიმოქმედებს სანქციების შემდეგ პაკეტზეც.
დიპლომატმა ასევე აღნიშნა, რომ ევროკავშირის ყველა წევრი ქვეყანა ამჟამად დეტალურად აანალიზებს სანქციათა მე-17 პაკეტს, თუმცა მათ მისი მიღების კუთხით სერიოზული სირთულეები არ ელით, ვინაიდან ეს შედარებით კონსენსუსზე დაფუძნებული პაკეტია და განსაკუთრებით სადავო ელემენტებს არ შეიცავს.
კომენტარები