“ყველა ოფიციალური, მსხვილი სტრუქტურა ებრძვის და ეომება ჭიათურას!” – რას ითხოვენ მაღაროელები? – ლორთქიფანიძე

მშრომელთა მთელი უბედურება და ყველა განსაცდელი ამ ერთ ქალაქს დაატყდა თავს…

და ვინ დგას დღეს ჭიათურელთა გვერდით?

ცენტრალური ხელისუფლება და ფაქტობრივი პრემიერ-მინისტრი პირდაპირ აცხადებენ, რომ მიმდინარეობს კერძო დავა და ისინი მაღაროელთა მხარეს არ დადგებიან. ქოცები ცდილობენ თავიანთ ახლობლებს ხელში ჩაუგდონ უზარმაზარი კაპიტალის მოპოვების მარტივი წყარო. ყველა ინვესტორის, მმართველის, კონტრაქტორის უკან “ქართული ოცნების” სხვადასხვა დინება დგას.

ადგილობრივი ხელისუფლება არარაობაა. ისინი არაფერს წარმოადგენენ. მეტიც, მდიდარი და გავლენიანი კლასის წინაშე თავის გამოჩენისთვის მუშაობენ, რათა გამოხრული ძვალი მაინც გადმოუგდონ. ჭიათურის მერი ინვესტორზე გარდატეხის ასაკში მყოფი, შეყვარებული, გონებაარეული ბიჭივით საუბრობს: “უნდა მოვეფეროთ მაგათ, მივეალერსოთ…”

ტრადიციულ როლს ასრულებს ყვითელი პროფკავშირი. მათი მეთაურების პოლიტიკური თავები უნდა დაგორდეს დელისის მეტროსთან (ფიგურალური გამონათქვამი). ჩადიან და მთავრობის, სოცკის, მსხვილი კაპიტალისტების ბრძანებებს ემორჩილებიან. ცდილობენ დაშალონ და გათიშონ მაღაროელთა ერთობა. დედას აგინებენ მაღაროელთა ლიდერებს.

დამსჯელ რაზმად არის ქცეული პოლიცია. გეგმავენ პროვოკაციებს მაღაროელთა წინააღმდეგ, შემდეგ ღამის სამ საათზე ცემა-ტყეპით აპატიმრებენ მოშიმშილეებს, ბოლოს კი ცხრაწლიანი ციხით ემუქრებიან მათ.

უღირსი ჟურნალისტები უკანონო გზებით მოპოვებულ პერსონალურ ინფორმაციას აფრიალებენ და შინშილის ფერმის მშენებლობის გამო ცდილობენ მაღაროელთა გაშავებას. ყველაფერს კადრულობენ პროპაგანდისტული მიზნების მისაღწევად.

გულგახეთქილმა ვუსმინე მეუფე დანიელს. როცა დემონსტრანტები ჭორვილაში ჩასვლას აპირებდნენ, ის მივიდა მაღაროელებთან და შეაჩერა მშრომელები. ამის შემდეგ მის მაღალყოვლადუსამღვდელოესობას ჰქონდა ორი კვირა, რათა მაღაროელთა გასაჭირის შესახებ მთავრობასთან ესაუბრა. არავის შეხვედრია, არავისთან უსაუბრია, არავინ შეუწუხებია, არცერთ კარზე არ დაუკაკუნებია… მხოლოდ შეუთვალა პრემიერ-მინისტრს, რომ იქნებ ჭიათურაზე მსჯელობის დროს მაღაროელებსაც მოუსმინოთო და იქიდან რაღაც ბუნდოვანი პასუხი მიიღო, მკაფიო თანხმობაც რომ არ ეთქმის, ისეთი… უდიდესი ავტორიტეტის მქონე, ლამის პატრიარქის მემკვიდრედ მიჩნეულ მიტროპოლიტს მეტი შეუძლია.

ერთი სიტყვით, ყველა ოფიციალური, მსხვილი სტრუქტურა ებრძვის და ეომება ჭიათურას! სხვები კი ზედმეტად თავს არ იწუხებენ ჭიათურელთათვის.

მაღაროელთა გაძლიერება მხოლოდ ჩვენ შეგვიძლია…

ისინი ითხოვენ ელემენტარულს: ადამიანურ ხელფასს, სტაბილურ და უსაფრთხო სამუშაო ადგილს, ნორმალურ საავადმყოფოს, სუფთა ჰაერსა და წყალს, მშობლიური სახლების ნგრევის შეჩერებას, ტყეებისა და სავარგულების გადარჩენას…

ისინი ითხოვენ სიცოცხლეს!

დროა უძლურებისგან გავთავისუფლდეთ, დავუდგეთ გვერდით ამ ხალხს! ჩვენი სიმრავლის ეშინიათ!