სხდომის მდივნიდან საკონსტიტუციო სასამართლოს თავმჯდომარეობამდე – ვინ არის ახალი თავმჯდომარე

საკონსტიტუციო სასამართლოს თავმჯდომარედ რევაზ ნადარაია აირჩიეს. ინფორმაციას სასამართლოს პრესსამსახური ავრცელებს.

რევაზ ნადარაიამ ხვიჩა კიკილაშვილი ჩაანაცვლა, რომელმაც თანამდებობა, მისივე განცხადებით, საკუთარი სურვილით დატოვა.

რევაზ ნადარაია 45 წლისაა და 2021 წლიდან უზენაეს სასამართლოში უვადოდ იყო განწესებული.

რევაზ ნადარაია იყო იუსტიციის საბჭოს მოსამართლე წევრებიდან ერთ-ერთი, რომელიც არამოსამართლე წევრის ნაზი ჯანეზაშვილის დასჯას მოითხოვდა. ნაზი ჯანეზაშვილი მას, როგორც კლანის წევრს მოიხსენიებდა.

რევაზ ნადარაიას უკავშირდება უზენაეს სასამართლოში ბიძინა ივანიშვილის დეიდაშვილის უჩა მამაცაშვილის სარჩელის მიღებაც.

რევაზ ნადარაია იყო მოსამართლეთა იმ სიაში, რომელთა კეთილსინდისიერების შემოწმებასაც ევროკავშირის პირობიდან გამომდინარე, „სასამართლოს გუშაგი“ ითხოვდა.

“ვამაყობ, რომ ლევან მურუსიძესთან მაქვს ურთიერთობა. ყველა თავდასხმას პირველი ლევან მურუსიძე იღებდა და ამ გარემოებებმა აქცია ლიდერად, თქვენც აღიარებთ მას ლიდერად,” – ასე მიმართა უზენაესი სასამართლოს მოსამართლეობის კანდიდატმა რევაზ ნადარაიამ “მოქალაქეების” ლიდერს ალეკო ელისაშვილს, პარლამენტის იურიდიულ საკითხთა კომიტეტის სხდომაზე 2021 წელს. რა დროსაც ის  უზენაესი სასამართლოს მოსამართლედ უვადოდ აირჩიეს.

რაც შეეხება სამუშაო გამოცდილებას:

2002-2005 წლებში მუშაობდა “ადვოკატთა კავშირი XXI”- ში ადვოკატად.

2005-2006 წლებში მუშაობდა თბილისის საქალაქო სასამართლოს სისხლის სამართლის საქმეთა კოლეგიაში სხდომის მდივნად.

2006-2007 წლებში მუშაობდა თბილისის საქალაქო სასამართლოს სისხლის სამართლის საქმეთა კოლეგიაში მოსამართლის თანაშემწედ.

2009-2010 წლებში იყო ჩხოროწყუს რაიონული სასამართლოს მოსამართლე და მივლინების საფუძველზე მოსამართლის უფლებამოსილებას ახორციელებდა ფოთის საქალაქო სასამართლოში.

2010-2016 წლებში იყო ფოთის საქალაქო სასამართლოს მოსამართლე.

2012-2016 წლებში იყო ფოთის საქალაქო სასამართლოს თავმჯდომარე.

2016 წლის თებერვლიდან არის თბილისის საქალაქო სასამართლოს მოსამართლე.

2016-2017 წლებში იყო თბილისის საქალაქო სასამართლოს საგამოძიებო და წინასასამართლო სხდომის კოლეგიის თავმჯდომარე.

2017-2018 წლებში იყო თბილისის სააპელაციო სასამართლოს სისხლის სამართლის საქმეთა პალატის მოსამართლე.

2018-2021 წლებში იყო თბილისის სააპელაციო სასამართლოს სამოქალაქო საქმეთა პალატის მოსამართლე.

2017-2020 წლებში იყო საქართველოს იუსტიციის უმაღლესი საბჭოს წევრი.

2019 წლის ოქტომბრიდან არის საპროკურორო საბჭოს წევრი.

2021 წლის ივლისიდან არჩეულია საქართველოს უზენაესი სასამართლოს მოსამართლედ უვადოდ, კანონით დადგენილი ასაკის მიღწევამდე.