დონალდ ტრამპმა ხელი მოაწერა ბრძანებას, რომელმაც სათავე დაუდო აშშ-ის განათლების დეპარტამენტის ლიკვიდაციის პროცესს. ეს იყო მისი ერთ-ერთი წინასაარჩევნო დაპირება.
ბრძანების – „საგანმანათლებლო მიღწევების გაუმჯობესება მშობლების, შტატების და ადგილობრივი თემების უფლებების და შესაძლებლობების გაძლიერებით“ ხელმოწერის ცერემონია თეთრ სახლში გაიმართა, რომელსაც ესწრებოდნენ გუბერნატორები, სახელმწიფო განათლების წარმომადგენლები და სკოლის მოსწავლეები.
ოვალურ კაბინეტში მოეწყო სკოლის კლასი, ტრამპისთვის ცალკე მერხით.
ჩვენ ვაპირებთ [განათლების დეპარტამენტის] დახურვას რაც შეიძლება მალე, მას ჩვენთვის არანაირ სარგებელი არ მოაქვს. – განაცხადა ტრამპმა.
ტრამპი, ისევე როგორც რესპუბლიკელთა უმეტესობა, დიდი ხანია დეპარტამენტის დახურვის მოწოდებით გამოდის, მაგრამ მისი სრულად ლიკვიდაციისთვის საჭიროა კონგრესის თანხმობა, რაც ნაკლებად სავარაუდოა.
ტრამპის თქმით, აშშ უფრო მეტ ფულს ხარჯავს განათლებაზე, ვიდრე მსოფლიოს ნებისმიერი სხვა ქვეყანა, თუმცა ამერიკელი მოსწავლეები „აკადემიური მოსწრებით ბოლოში არიან“.
„მიუხედავად იმისა, რომ განათლების დეპარტამენტი არავის ასწავლის, ის ინარჩუნებს საზოგადოებასთან ურთიერთობის განყოფილებას, რომელშიც 80-ზე მეტი თანამშრომელია და წელიწადში 10 მილიონ დოლარზე მეტი ჯდება. განათლების დეპარტამენტის დახურვა ბავშვებსა და მათ ოჯახებს მისცემს შესაძლებლობას გამოვიდნენ იმ სისტემიდან, რომელიც მათ ძირავს. […] ფედერალური ბიუროკრატია განათლებაში არ მუშაობს.”
კომენტარები