ივანიშვილის მინისტრის, ანრი ოხანაშვილის ბრძანებით, 10 მარტიდან საქართველოში პირადობისა და ბინადრობის მოწმობები ახალი დიზაინით გაიცემა.
ბრძანების მიხედვით, პირადობის მოწმობის ვადა ისევ 10 წელი იქნება, თუმცა ბარათზე ამიერიდან დატანილი იქნება QR კოდი, რომლის მეშვეობით შესაძლებელი იქნება დოკუმენტის ან/და პირის შესახებ ინფორმაციის გადამოწმება.
QR კოდთან ერთად, ახალი ID ბარათები ასევე მოიცავს სახელს; გვარს; სქესს; მოქალაქეობას; დაბადების თარიღს; დაბადების ადგილს; პირად ნომერს; ფოტოსურათს; პირადი ხელმოწერის ნიმუშს; მოწმობის გამცემი ორგანოს დასახელებას; მოწმობის გაცემის თარიღს; მოწმობის მოქმედების ვადას; ფიზიკური პირის ავთენტიფიკაციის სერტიფიკატს, შესაბამის დახურულ გასაღებს და სერტიფიკატის გამცემ ორგანოს; კვალიფიციური ელექტრონული ხელმოწერის სერტიფიკატს, შესაბამის დახურულ გასაღებს და სერტიფიკატის გამცემ ორგანოს და მოწმობის წვდომის კოდს.
ამასთან ერთად, კვლავ ძალაში რჩება დათქმა, რომლის მიხედვითაც, მოწმობის ინდივიდუალური ნომრის ნიმუშია 00AA00001, რომლიდანაც პირველი ორი ციფრი აღნიშნავს გამოშვების წელს, შემდეგი ორი სიმბოლო (სერია) – ლათინური ასოების ნებისმიერ ცვლად კომბინაციას, გარდა კომბინაციებისა PR, TR, RT და TI, ხოლო შემდეგი (ბოლო) ხუთი ციფრი – რიგით ნომერს 00001-დან 99999-მდე სერიის ფარგლებში (მაგალითად, 12345), გარდა კომბინაციებისა 666XX, X666X, XX666.(ტაბულა)
კომენტარები