გიორგი ბაჩიაშვილის განცხადებით, გერმანელმა ექსპერტებმა დაადგინეს რომ მისი და ივანიშვილის 10 წუთიანი სატელეფონო საუბრი არც დამონტაჟებულია, არც წყვეტები აქვს და არც არაავეთნტურია, არადა საწინააღმდეგოს ამტკიცებდა პროკურატურა, საქართველოში ჩატარებული კვლევით.
- ცნობისთვის, სამხარაულის ბიუროს ექსპერტმა, ასმათ მატუშევსკაიამ აუდიოჩანაწერში ბიძინა ივანიშვილის ხმის იდენტიფიცირება ვერ შეძლო და თან დაწერა, რომ აუდიო დამონტაჟებულია.
ექსპერტიზა ადასტურებს ჩანაწერის ნამდვილობას, ექსპერტიზამ ჩემი და ივანიშვილის ხმები ამოიცნო, როგორც პროკურატურის მიერ მიწოდებულ სანიმუშო დისკში იყო მითითებული იყო. მათ ძალიან პროფესიონალური კვლევა აქვთ ჩატარებული მრავალი პროგრამის გამოყენებით“, – განაცხადა ბაჩიაშვილმა.
თანაინვესტირების ფონდის ყოფილი ხელმძღვანელის ადვოკატი, ლევან მახარაშვილი ამბობს, რომ გერმანულმა ექსპერტიზამ განსხვავებით სამხარაულისგან, დადგინდა ფაილის შექმნის თარიღი და მოწყობილობა, რითაც ჩაწერილია საუბარი. ასევე თქვა, რომ არცერთი წყვეტა არ არსებობდა, რომელიც მონტაჟზე მიუთითებდა.
“განსხვავებით სამხარაულისგან, დადგინდა ფაილის შექმნის თარიღი და მოწყობილობა. მითითებულია, რომ შექმნილია სმარტფონზე. მითითების თარიღი გახლავთ 2015 წელი. ის ე.წ. წყვეტები, შავი ხაზები, რაც მიაჩნდა სამხარაულს რატომღაც მონტაჟად, ეს სათანადო, ლიცენზირებული, პროგრამული უზრუნველყოფის დამუშავებით დადგინდა, რომ საუბრის დროს მოსაუბრეთა შორის იყო ან პაუზა, ან კიდე გამოწვეული იყო აუდიო ფაილის ხარისხით. შესაბამისად, არცერთი წყვეტა არ არსებობდა, რომელიც მიუთითებდა მონტაჟზე. საბოლოო ჯამში, ევროპულმა საექსპერტო ბიურომ, რომელიც ერთ-ერთი ყველაზე წარმატებული და ცნობილია ამ დარგში დაასკვნა, რომ აუდიო ფაილი არ არის მონტაჟი და არ აღენიშნება რედაქტირების აშკარა კვალი”, – ამბობს ლევან მახარაშვილი.
გიორგი ბაჩიაშვილს “ქართული ოცნების” დამფუძნებლის, ბიძინა ივანიშვილის კრიპტოვალუტის მითვისებას ედავებიან. პროკურატურის მტკიცებით, საქმე ეხება 2017 წლის ქმედებას. კერძოდ, გამოძიების ცნობით, გიორგი ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ, მხოლოდ 536 900 დოლარი გადასცა, ხოლო დარჩენილი, ინვესტორის კუთვნილი, 8 253.13 ოდენობის ბიტკოინი მართლსაწინააღმდეგოდ მიითვისა, რომლის ღირებულება მისი დაუფლების პერიოდში 39 215 820 დოლარს შეადგენდა. გასული წლის 6 ივლისს თანაინვესტირების ფონდის ყოფილ ხელმძღვანელს აღმკვეთი ღონისძიების სახით 2 მილიონ 500 ათას ლარიანი გირაო შეეფარდა. ამასთან, საქმის გამოძიების დასრულებამდე, მას ქვეყნის დატოვება აეკრძალა.
კომენტარები