სპორტის მოქმედმა მინისტრმა “სანატორიუმი ლიკანი” ყოფილ მინისტრს მიჰყიდა

288,000 კვადრატული მეტრის ფართობის „სანატორიუმ ლიკანი“ სპორტის ამჟამინდელმა მინისტრმა შალვა გოგოლაძემ „სანატორიუმი ლიკანი“ სპორტის ყოფილ მინისტრს ტარიელ ხეჩიკაშვილს მიჰყიდა.

ამის შესახებ ინფორმაციას bm.ge ავრცელებს.

ირკვევა, რომ აღნიშნული უძრავი ქონება მთავრობამ გასული წლის ოქტომბერში შპს “რაიმონდს” 16,2 მლნ ლარად გადასცა, რომლის 50%-იან წილს სპორტის მინისტრი შალვა გოგოლაძე ფლობდა. სამეწარმეო რეესტრის ამონაწერიდან კი ირკვევა, რომ „რაიმონდის“ 100%-იანი წილის მფლობელი შპს “იბერია აზც ორბი” გახდა.

• აღნიშნული კომპანია 2024 წლის ივნისშია შექმნილი, რომლის დირექტორებს სლოვაკი რობერტ სპისაკი და საქართველოს სპორტის ყოფილი მინისტრი ტარიელ ხეჩიკაშვილი წარმოადგენენ. კომპანიის 50%-ს ფლობს შეზღუდული პასუხისმგებლობის საზოგადოება შპს “სლოვაკ ბიზნეს ჰაუსი”, რომლის 70%-იან წილი ხეჩიკაშვილების კომპანია შპს “იბერია ინვესტის” მფლობელობაშია.

გამოდის ტარიელ ხეჩიკაშვილის კომპანიას მოუწევს იმ საინვესტიციო ვალდებულებების შესრულება, რა პირობებითაც „სანატორიუმი ლიკანი“ მთავრობამ შალვა გოგოლაძის კომპანიას გადასცა.

• მთავრობის 18 ოქტომბრის განკარგულების თანახმად კი, საპრივატიზებო თანხის გადახდა უნდა მოხდეს ხელშეკრულების გაფორმებიდან 36 თვის ვადაში ორ ნაწილად: 5 427 765 ლარი 12 თვის ვადაში, დარჩენილი 10 855 528 ლარი – 24 თვის ვადაში.

ამასთან, საპრივატიზებო პირობის თანახმად, 2030 წლის 31 დეკემბრამდე მფლობელმა კომპანიამ პირადად ან მესამე პირის მეშვეობით „სანატორიუმ ლიკანის“ საკუთრებაში არსებული უძრავი ქონების (საკადასტრო კოდი 64.23.01.093) ან მისი ნაწილის განვითარება უნდა უზრუნველყოს, რაც უნდა მოიცავდეს არანაკლებ 30 კოტეჯის (არანაკლებ 3000 კვ/მ ფართობის მქონე) მშენებლობას. ამასთან, შეიძლება მოიცავდეს ბორჯომში, სანატორიუმ ლიკანის საკუთრებაში არსებული მიწის ნაკვეთის განაშენიანების რეგულირების გეგმის დამტკიცებას და საპროექტო/სამშენებლო დოკუმენტაციის მომზადებას.

• ამ ვალდებულებების შესასრულებლად კი, კომპანიამ პირადად ან მესამე პირის მეშვეობით, არანაკლებ 3 მლნ ლარის ინვესტიცია უნდა განახორციელოს.

შესაბამისი განკარგულებით ასევე გათვალისწინებულია ხელშეკრულების გაფორმებიდან არაუმეტეს ექვსი თვის ვადაში, აღნიშნული უძრავი ქონებიდან, არანაკლებ 10 280 კვ/მ მიწის ნაკვეთისა და მასზე განთავსებული შენობა/ნაგებობის ყოველგვარ უფლებრივი ტვირთისგან, მათ შორის, მესამე პირის იპოთეკის უფლებისგან თავისუფალ მდგომარეობაში სახელმწიფოსთვის უსასყიდლოდ საკუთრებაში გადაცემა.