კოალიცია “ძლიერი საქართველოს” ლიდერმა, მამუკა ხაზარაძემ ის სამი ნაბიჯი დაასახელა, რომელსაც ყველაზე დიდი ოპოზიციური გაერთიანება ხელისუფლებაში მოსვლიდან 3 კვირის განმავლობაში გადადგამს.
მამუკა ხაზარაძის განცხადებით, “ძლიერი საქართველოს” ხელისუფლება პარლამენტთან ერთად იმუშავებს იმაზე, რომ რუსული კანონი დაჩქარებული წესით გაუქმდეს.
ამასთან, ოპოზიციონერი პოლიტიკოსის თქმით, “ძლიერი საქართველოს” ხელისუფლება ამ პერიოდის განმავლობაში ასევე დაიწყებს 9-პუნქტიანი გეგმის განხორციელებას, რათა ევროკომისიის მოთხოვნები ორგანიზაციის წევრობისთვის შესრულდეს.
პირველი სამი კვირის განმავლობაში ჩვენ გავაუქმებთ რუსულ კანონს, რათა დავასრულოთ რუსული რეპრესიები ჩვენს ხალხზე და ხელახლა გავხსნათ გზა ევროკავშირის წევრობისა და ევროპული მომავლისკენ”, – ამბობს მამუკა ხაზარაძე.
მამუკა ხაზარაძის ცნობით, პირველი სამი კვირის განმავლობაში “ძლიერი საქართველოს” ხელისუფლება უზრუნველყოფს ბიუჯეტს, რომელიც პენსიას 1 000 ლარამდე გაზრდის.
თუ “ძლიერ საქართველოს” ექნება მომავალი მთავრობის ფორმირების შესაძლებლობა, აქ გათვალისწინებული იქნება კოალიციური შეთანხმების ელემენტი, რომ ყველა კოალიციური პარტნიორი მხარს დაუჭერს ბიუჯეტის პარამეტრების შეცვლას, რათა პენსიის 1,000 ლარამდე გაზრდა შესაძლებელი იყოს.
პირველი სამი კვირის განმავლობაში ჩვენ ხელახლა გამოვიტანთ საპარლამენტო კენჭისყრაზე ანაკლიის პორტის ტენდერის საკითხს და ავკრძალავთ ყველა დასავლეთის მიერ სანქცირებულ კომპანიას – მაგალითად, “ქართული ოცნების” მიერ მხარდაჭერის ჩინურ სახელმწიფო კომპანიას, რომელსაც კორუფციისა და სკანდალების მთელი ისტორია აქვს“ – აცხადებს მამუკა ხაზარაძე.
როგორც მამუკა ხაზარაძემ აღნიშნა, “ძლიერი საქართველოს” ხელისუფლება იმუშავებს პარლამენტთან ერთად, რომ გამოიყენოს დაჩქარებული ზომები კანონმდებლობაში შესაბამისი ცვლილებების შესატანად, რათა ხელახლა გამოცხადდეს ანაკლიის პროექტის ტენდერი.
ამასთან, ოპოზიციონერი ლიდერის თქმით, ეროვნულ სტრატეგიულ ობიექტებთან დაკავშირებულ ტენდერებში მონაწილეობის მიღებას ვერ შეძლებენ დასავლელი პარტნიორების მიერ სანქცირებული კომპანიები – კორუფციის, გარემოს დაზიანების, დასაქმებულთა უფლებების დარღვევის თუ სხვა მსგავსი დარღვევების გამო.
კომენტარები