“ერთი თვე კურსკის ოპერაციიდან – რუსული მშვიდობის დამკვიდრების არსებული მცირე შანსიც კი დასრულდა” – თავდგირიძე

საქარველოს თავდაცვის ძალების  თადარიგის პოლკოვნიკი, სამხედრო ექსპერტი, გიორგი თავდგირიძე:

ერთი თვე გავიდა კურსკის ოპერაციის დაწყებიდან. რომ შევაჯამოთ, კურსკის ოპერაცია წარმატებით დაიწყო, წარმატებით გაგრძელდა და ყველა პირობაა იმისთვის, რომ სამხედრო მოქმედებების თეატრი რუსეთის ტერიტორიაზე გაფართოვდება. უკრაინის შეიარაღებული ძალები დამკვიდრდა რუსეთის ტერიტორიაზე, ჩამოაყალიბა სრულფასოვანის პლაცდარმი ახალი წარმატებული შეტევებისათვის და რაც მთავარია გავიდა შეუზღუდავ ოპერატიულ სივრცეებზე. ამით ხელში აიღო ინიციატივა და მოწინააღმდეგეს მოქმედების მაღალ ტემპს თავაზობს. რუსებისთვის მოულოდნელი აღმოჩნდა მოწინააღმდეგის თამამი მოქმედება, მოუმზადებელი აღმოჩნდა არა მხოლოდ საჭირო ძალების არსებობის თვალსაზრისით, არამედ საერთოდ ფიასკო განიცადა ოპერატიული ვითარების ადეკვატურ შეფასებაში და მოწინააღმდეგის მოქმედების შედეგად შექმნილ ოპერატიულ და ტაქტიკური პრობლემების გადაჭრაში. ოპერაციიდან ერთი თვის თავზე, რუსებს ჯერაც არ შეუქმნიათ საჭირო სიდიდის ძალა, რომელიც კურსკის ფრონტის საჭიროებისათვის საკმარისი იქნება. ყოველი დღე, რომელსაც უკრაინელები ფრონტის ამ მონაკვეთზე მყარი პლაცდარმის შექმნაში იღებენ, ართულებს რუსების სრულფასოვან პასუხისათვის საჭირო ძალების მობილიზებას, რაკი ზრდის მათ რაოდენობრივი და შეიარაღების პარამეტრების მინიმალურ თამასას.

კურსკის ოპერაციის ერთ ერთი მნიშვნელოვანი თანმდევი შედეგია ომის ახალ ფაზაში გადასვლა, ახალი შინაარსის შემოტანა:

1. რუსეთის სპეცოპერაცია უკრაინაში წარუმატებლად დასრულდა, ომი რუსეთის ტერიტორიაზე გადავიდა და სპეციალური ოპერაციის გასაგრძელებლად, რუსეთმა ჯერ ომი უნდა მოიგოს რუსეთში, რაც შეუძლებელია რაკი ფრონტის მთელ ზოლზე იგივე ძალები იბრძვის და კურსკის მიმართულებით უკრაინელები აშკარა უპირატესობას ფლობენ.

2. უკრაინა აღარ არის სახელმწიფო რომელიც იბრძვის ტერიტორიულ მთლიანობის აღსადგენად, ომმა მიიღო კონფიგურაცია, როდესაც ფრონტის ერთი მონაკვეთი რუსეთშია, მეორე უკრაინაში. რუსეთის მორალური დომინაცია ამ ომში დასრულდა.

3. უკრაინელებმა აჩვენეს, რომ ისინი ცივილიზებული, ევროპული ღირებულებების მატარებლები არიან და ისინი ოკუპირებულ ტერიტორიებზე ომის კანონმდებლობის და ჰუმანიზმის პრნციპების სრული დაცვით იქცევიან.

4. რუსეთი არა მხოლოდ რეალურ სამყაროში, არამედ ვირტუალურშიც მარცხდება. ომის საინფორმაციო უზრუნველყოფის ემოციური ნაწილი ( გამარჯვების იმიტაცია პათეთიკით) ვერ ფარავს არსებულ ცუდ მდგომარეობას ფრონტის ხაზზე.

5. რუსული მშვიდობის დამკვიდრების არსებული მცირე შანსიც კი დასრულდა. მშვიდობა მხოლოდ ერთი მხარის მარცხის აღიარებით დადგება.