რა შემთხვევაში საჭიროებს მიომა ქირურგიულ ჩარევას და როგორია მისი მკურნალობის მეთოდები?

საშვილოსნოს მიომა გინეკოლოგიურ პაციენტებში ერთ-ერთი ყველაზე გავრცელებული დაავადებაა. არსებობს ასიმპტომური და სიმპტომური მიომა.

ასიმპტომური მიომა საჭიროებს მხოლოდ დინამიკურ დაკვირვებას, ხოლო სიმპტომური მიომა მედიკამენტოზურ ან ქირურუგიულ მკურნალობას, საშვილოსნოს არტერიების ემბოლიზაციას ან მიომის რადიოაბლაციას. მკურნალობის მეთოდები ინდივიდუალურია კონკრეტულ შემთხვევაში და დამოკიდებულია სხვადასხვა ფაქტორზე.

ალიას ესაუბრება მეან–გინეკოლოგი, ონკოგინეკოლოგი, ენდოვიდეოქირურგი, ნინო მერებაშვილი.

– რატომ გადაწყვიტეთ ექიმობა?

– ექიმობა პატარაობიდანვე მსურდა ერთი შემთხვევის გამო. მამა იყო უმძიმესი ავადმყოფი და სიცოცხლის მეორე შანსი მას ცნობილმა ვირტუოზმა ქირურგმა პროფესორმა საშა ბეთანელმა მისცა. მთელი ცხოვრება მისი მადლობელი ვიქნები. ამ ფაქტმა ჩემზე ძალიან იმოქმედა ემოციურად და გადავწყვიტე, როდესაც გავიზრდებოდი მეც დავხმარებოდი ადამიანებს გამოჯანმრთელებაში. სამედიცინო უნივერსიტეტში სწავლისას აღმოვაჩინე, რომ ჩემთვის ყველაზე საინტერესო იყო ქალის ორგანიზმი და მასში მიმდინარე პროცესები. იმ დაავადებების დიაგნოსტირება და მკურნალობა, რომლებიც უშუალოდ ქალის ორგანიზმს უკავშირდება – ამიტომ გავყევი გინეკოლოგიას.

– რა არის საშვილოსნოს მიომა? რა სიმპტომები აქვს?

–საშვილოსნოს მიომა არის საშვილოსნოს კეთილთვისებიანი სიმსივნე, რომელიც ქალების 20-30% -ში არის გავრცელებული. არსებობს სიმპტომური და ასიმპტომური მიომა. სიმპტომურ მიომას ახასიათებს ჭარბი მენსტრუაციული სისხლდენა, ტკივილები მენჯის არეში, მუცლის გარშემოწერილობის ზრდა, გახშირებული შარდვა ან ხშირად ყაბზობა, რიგ შემთხვევაში იწვევს ორსულობის შეუნარჩუნებლობას. მიომა მენოპაუზურ ასაკში განიცდის რეგრესს – მენსტრუალურ ფუნქციის შეწყვეტასთან ერთად პატარავდება.

–რომელია საშვილოსნოს მიომის ძირითადი გამომწვევი მიზეზები?

–საშვილოსნოს მიომის გამომწვევ მიზეზებზე საუბარი ძალიან ძნელია, მაგრამ რაც ზუსტად შესაძლებელია ითქვას, არსებობს გენეტიკური წინასწარგანწყობა. არსებობს მოსაზრება, რომ ჰორმონალური დისბალანსიც ერთ–ერთი გამომწვევი მიზეზია, მაგრამ ეს მოსაზრება საკმაოდ წინააღმდეგობრივია და დაუდასტურებელი. ბოლო პერიოდში გარკვეული როლი ენიჭება D ვიტამინის დეფიციტს მიომის კვანძის ზრდის პროცესში.

–რა შემთხვევაში უნდა მიმართოს პაციენტმა გინეკოლოგს?

–პაციენტმა ზოგადად ექიმს უნდა მიმართოს პროფილაქტიკური გინეკოლოგიური შემოწმებისათვის. პროფილაქტიკურ კვლევებს და დროულ დიაგნოსტირებას, შემდეგ კი დინამიკაში დაავადების დაკვირვებას (იზრდება, თუ არა) ძალიან დიდი მნიშვნელობა აქვს.

– როგორ ხდება გამოკვლევა? უსაფრთხოა?

–კვლევა სრულიად უსაფრთხოა ეს არის გინეკოლოგიური გასინჯვა და ულტრაბგერითი კვლევის ჩატარება. რიგ შემთხვევებში კეთდება მაგნიტურ რეზონანსული ტომოგრაფია.

– საშვილოსნოს მიომის მკურნალობის რა მეთოდები არსებობს?

– არსებობს მედიკამენტური და ქირურგიული მკურნალობა, საშვილოსნოს არტერიების ემბოლიზაცია, მიომის კვანძის რადიოაბლაცია. მედიკამენტური მკურნალობა უფრო მიმართულია ჭარბი მენსტრუალური სისხლდანაკარგის შემცირებაზე ან ტკივილის შემცირებაზე.

ქირურგიული მკურნალობა შესაძლებელია ჩატარდეს ჰისტეროსკოპიის, ლაპაროსკოპიის, ლაპაროტომიის ან ვაგინალური ქირურგიის მეშვეობით. ყველაფერი დამოკიდებულია საშვილოსნოს მიომის ტიპზე, საშვილოსნოს ზომებზე, მომავალში სასურველი ორსულობის შესაძლებლობაზე. ვკვეთავთ საშვილოსნოს ან მარტო მიომის კვანძს. ნიუ ჰოსპიტალსში ასევე ტარდება საშვილოსნოს არტერიების ემბოლიზაცია.

–შესაძლებელია თუ არა საშვილოსნოს მიომის პრევენცია?
–რთულია პრევენციაზე საუბარი, ვინაიდან მისი გამომწვევი მიზეზები ასე ნათლად ცნობილი არ არის და მხოლოდ ვიცით, რომ გენეტიკური წინასწარგანწყობა არსებობს. პრევენციის ერთადერთი საუკეთესო გზაა ქალბატონებმა, რომლებმაც იციან რომ აქვთ წინასწარგანწყობა გენეტიკური, ანუ მიომა აქვს დედას, დეიდას, დას, ბებიას – აუცილებლად უნდა მიმართონ ექიმს და ჩაიტარონ გინეკოლოგიური შემოწმება. პროფილაქტიკური გინეკოლოგიური გასინჯვები არის ყველაზე კარგი პრევენცია ბევრი გინეკოლოგიური პათოლოგიის.

რამდენიმე რეკომენდაცია მინდა მივცე ქალბატონებს, რომლებსაც აქვთ საშვილოსნოს ლეიომიომა – სოლარიუმი ან მზეზე გარუჯვა ხელს უწყობს მიომის კვანძის აქტიურ ზრდას. ნუ მიიღებთ თვითნებურად გაურკვეველი წარმოშობის ბიოდანამატებს – ესეც რისკ–ფაქტორია. აკონტროლეთ სისხლში D ვიტამინის დონე.

(R)