ვირუსი იცვლება, მაგრამ ეს არ ნიშნავს, რომ ის უარესი ხდება – მკვლევარი

ახალი გენეტიკური ანალიზი აჩვენებს, რომ კორონავირუსი მსოფლიოში ჯერ კიდევ გასული წლის ბოლოს გავრცელდა, – ამის შესახებ CNN-ი წერს.

ბრიტანელმა მკვლევრებმა, მთელი მსოფლიოდან, 7 600-ზე მეტი პაციენტის შემთხვევა გამოიკვლიეს. კვლევის ფარგლებში, მეცნიერებმა ვირუსის მუტაციაც შეისწავლეს და დაადგინეს, რომ ვირუსის გავრცელება ძალიან სწრაფი ტემპით მოხდა.

ლონდონის საუნივერსიტეტო კოლეჯის გენეტიკის ინსტიტუტის მკვლევრის, ფრანსუა ბოლუს თქმით, „ვირუსი იცვლება, მაგრამ ეს არ ნიშნავს იმას, რომ ის უარესი ხდება“.

„ზოგიერთი მეცნიერი ფიქრობდა, რომ ვირუსი აქამდე რამდენიმე თვის განმავლობაში არსებობდა მოსახლეობაში. ეს, შეიძლებოდა, იმედისმომეცემი ყოფილიყო, ვინაიდან ამ ლოგიკით, მოსახლეობის გარკვეულ ნაწილს იმუნიტეტი გამოუმუშავდა ვირუსის მიმართ. ჩვენი კვლევა გამორიცხავს ყველა სცენარს, რომლის თანახმადაც, SARSCoV-2 იდენტიფიცირებამდე დიდი ხნით ადრე გავრცელდა მოსახლეობაში. ჩვენმა კვლევამ აჩვენა, რომ ვირუსი ადამიანებში 2019 წლის ბოლოს გაჩნდა“, – აცხადებს ფრანსუა ბოლუ.

ბრიტანეთი არაა ერთადერთი ქვეყანა, სადაც მეცნიერები ვირუსის ჯერ კიდევ გასულ წელს გავრცელებაზე საუბრობენ. პარიზში მდებარე ერთ-ერთი საავადმყოფოს ექიმების განცხადებით, პაციენტი, რომელიც გასული წლის დეკემბერში ავად გახდა, კორონავირუსით იყო ინფიცირებული. თუმცა, Covid-19-ის გავრცელების შესახებ პირველი ინფორმაცია საფრანგეთში 24 იანვარს დაფიქსირდა. „კორონავირუსი საფრანგეთში 2019 წლის დეკემბრის ბოლოს უკვე გავრცელებული იყო, ქვეყანაში ოფიციალურად გამოვლენილ პირველ შემთხვევამდე ერთი თვით ადრე“ , – წერს Groupe Hospitalier Paris Seine-ის ექიმთა ჯგუფი.