რუსი დილერები და სანქცირებული მანქანების რუსეთში საქართველოდან – დეკანოიძის კითხვა ფინანსთა მინისტრს

თვლით თუ არა პრობლემად, რომ საქართველოს ტერიტორია გამოიყენება სანქცირებული მანქანების რუსეთში გადასაყვანად? – შემიძლია კონკრეტული მასალები გაჩვენოთ, – ამ კითხვით მიმართა „ევროოპტიმისტების“ დეპუტატმა ხატია დეკანოიძემ ფინანსთა მინისტრ ლაშა ხუციშვილს.

ხატია დეკანოიძე:

„კონკრეტულ სქემაზე მინდა გკითხოთ – როგორ ღარიბდება საქართველოს მოქალაქე, როცა რუს დილერებს უკანონოდ გადაჰყავთ მანქანები საქართველო-რუსეთის საზღვარზე. მთავრობის გადაწყვეტილებით, გახსოვთ, რომ 2023 წლის შემოდგომიდან აიკრძალა რუსეთში სანქცირებული მანქანების ექსპორტი, 50 ათასი ევროს ღირებულების და 1.9 ლიტრზე დიდი მოცულობის ძრავის მქონე მანქანებზეა საუბარი, მაგრამ მე შემიძლია გაჩვენოთ კონკრეტული მასალები, სადაც ჩანს, რომ საქართველო გამოიყენება როგორც მესამე ქვეყანა და ჩვენი ქვეყნიდან სანქცირებული მანქანები გადადის რუსეთში. მათ შორის, არსებობენ რუსი დილერები, რომლებმაც წაართვეს ბიზნესი საქართველოს მოქალაქეებს და დაარეგისტრირეს აქ მდიდრდებიან უკანონო შემოსავლებით. გაქვთ თუ არა ინფორმაცია, რომ არ არის შეზღუდული სანქცირებული მანქანების ერთი-ერთი პრინციპით (გადაყვანა) ანუ ინდივიდუალურ მძღოლებზე მაქვს საუბარი, როცა მათ გადაჰყავთ და მერე იქიდან ფეხით გადმოდიან? თქვენ მოგმართეს ამაზე კითხვით, მაგრამ კონკრეტული ინფორმაცია არ ყოფილა ამასთან დაკავშირებით. თვლით თუ არა პრობლემად, რომ საქართველოს ტერიტორია გამოიყენება სანქცირებული მანქანებისთვის, რომლებიც რეალურად აკრძალულია და სანქციების ამ ნაწილს მიერთებული ვართ. რუსეთში ხვდება ის მანქანები, რომელიც საქართველოს მთავრობის განკარგულებით აიკრძალა“,- განაცხადა დეკანოიძემ.

ლაშა ხუციშვილმა ხატია დეკანოიძეს უპასუხა და უთხრა, რომ საქართველოში სანქციების დარღვევის ფაქტები არ არსებობს.

საქართველოში სანქციების აღსრულება სრულად ხდება. არ არსებობს სანქციების დარღვევის ფაქტები საქართველოში. სანქციების აღსრულება ხდება იმ ფორმითა და მასშტაბით, რა ფორმითა და მასშტაბითაც ჩვენი საერთაშორისო პარტნიორების მიერაა დადგენილი. უშუალოდ საქართველოს სანქციები დაწესებული არ აქვს. საქართველო არის სანქციების აღმასრულებელი და იმ ფორმით და იმ მასშტაბით ასრულებს სანქციებს, რა ფორმითა და მასშტაბითაც არის დადგენილი. თუ თქვენი პირადი უკმაყოფილება ისაა, რომ ეს სანქციები არ არის ისეთი მასშტაბური, ან იმ ფორმით არაა, რა ფორმითაც თქვენ სურვილი გაქვთ, შესაძლებელია, მიმართოთ საერთაშორისო პარტნიორებს, რომ სანქციები დაადგინონ სხვა ფორმით. სანქციებთან მიმართებით, ბევრი მაგალითი შემიძლია გითხრათ, რომ უამრავი გამონაკლისია. ბუნებრივია, საქართველო არ ყოფილა მონაწილე, როდესაც სანქციებზე მუშაობა მიმდინარეობდა. არ ვართ მონაწილე იმის [პროცესის], რომ აზრი გამოვთქვათ სანქციებთან მიმართებით, რა ფორმით და როგორ უნდა იყოს, შესაბამისად, ვასრულებთ იმ ფორმით, რა ფორმითაცაა დადგენილი, თუმცა არაერთ ქვეყანას უამრავი რეზერვაცია აქვს გაკეთებული, რომ კონკრეტული საქონელი ან ტრანზაქცია არის გამონაკლისში. ამასთან დაკავშირებით ჩვენ განმარტებას ვერ გავაკეთებთ. შესაძლოა, პარტნიორებმა გააკეთონ განცხადება, რატომაა ესა თუ ის ტრანზაქცია ან საქონელი გამონაკლისში, ასეთი გამონაკლისები არსებობს. არ არის ეს საიდუმლო. როდესაც განცხადებას ვაკეთებთ, ვუთითებთ პირველწყაროს, საიდან და რა ფორმითაა სანქციები დაწესებული. როდესაც კითხვა გაჩნდება, უნდა შეხედოთ სანქციებს, რა არის დაწესებული და ხდება თუ არა მის შესაბამისად აღსრულება. ბუნებრივია, ბევრი ადამიანი, შესაძლოა, ვერ ერკვეოდეს, რადგან ტექნიკური ნაწილი აქვს ამას. ამიტომ მივუთითებთ ყველას, რომ სანამ დეზინფორმაციას გაავრცელებთ, გთხოვთ, გადაამოწმოთ კომპეტენტურ ორგანოსთან“, – განაცხადა ლაშა ხუციშვილმა.