“პრეზიდენტი არცერთ ვარიანტში არ უნდა გადადგეს” – დავით ზურაბიშვილი

ანალიტიკოსი, დავით ზურაბიშვილი:

ა) ერთობის პლატფორმა უნდა იყოს მიმართული პოლარიზაციის წინააღმდეგ და პრინციპულად უარყოფდეს ოპონენტისგან მტრის ხატის შექმნის პოლიტიკას. პლატფორმა უნდა იყოს სრულად და არსებითად გამიჯნული ორი მთავარი საინფორმაციო-პოლიტიკური ბანაკისგან. შესაბამისად ამ გაერთიანებაში არავითარ შემთხვევაში არ უნდა ფიგურირებდეს ნაციონალური მოძრაობა, აგრეთვე ის პოლიტიკოსები, რომლებიც ასოცირდებიან ძალმომრეობასა და ავტორიტარიზმთან. ქართული ოცნება რომ არ იფიგურირებს, ეს ისედაც ვიცით.

ბ) ერთობის პლატფორმის მიერ წარმოებული კამპანია უნდა იყოს პრინციპულად პოზიტიური. ცხადია ოპონენტის კრიტიკას სრულად ვერ აცდები, მაგრამ პრიორიტეტი ცალსახად უნდა მიენიჭოს იმის წარმოჩენას, თუ რით ჯობია ეს გაერთიანება ორ პოლარიზებულ ბანაკს და რა სიკეთეს მოიტანს მისი გამარჯვება.

გ) პრეზიდენტი ზურაბიშვილი არცერთ ვარიანტში არ უნდა გადადგეს, რადგან ამ შემთხვევაში ჩატარდება პრეზიდენტის რიგგარეშე არჩევნები და არსებული კანონმდებლობით ოცნება ადვილად გაიყვანს მისთვის სასურველ კანდიდატს. სალომე ზურაბიშვილი უნდა დარჩეს თანამდებობაზე, არ მიიღოს პირდაპირი მონაწილება საარჩევნო კამპანიაში, მაგრამ მისი ინიციატივით შექმნილი პლატფორმა როცა პოლიტიკურ გაერთიანებად გადაკეთდება, ეს მაინც მას მიეწერება და ამ ახალი სუბიექტის სიმბოლური შემკვრელი და გამაერთიანებელი მაინც ის იქნება ხალხის თვალში.

მესმის, რომ თითოეული პუნქტი მეტ გაშლას და სხვადასხვა ნიუანსების დაზუსტებას მოითხოვს, მაგრამ აქ ამის ადგილიც არ არის და პრინციპში თუ ეს სამივე პუნქტი ზოგადი დებულების დონეზე მისაღებია, სხვა ყველაფერი წმინდა ტექნიკური საკითხია.

და თუ ასეთი გაერთიანების შექმნა წინასაარჩევნოდ მოხერხდა, მე პირადად სრულიად დარწმუნებული ვარ, რომ რეიტინგის და გავლენის თვალსაზრისით ეს იქნება ქართული ოცნების და ნაციონალური მოძრაობის ტოლფარდი ძალა, რაც ფუნდამენტურად და სასიკეთო მიმართულებით შეცვლის ვითარებას ჩვენს ქვეყანაში.