“რუსეთ-საქართველოს კონფლიქტის მოგვარება უმაღლესი ეროვნული ამოცანაა” – კობახიძე

პარლამენტის პლენარული სხდომის დარბაზში ფრაქცია „ერთიანი ნაციონალური მოძრაობა” და ოპოზიციური პოლიტიკური ჯგუფები უსმენენ პრემიერ-მინისტრობის კანდიდატის, ირაკლი კობახიძის სამთავრობო პროგრამას. სხდომის წამყვანი არის თინა ბოკუჩავა, ენმ-ის ფრაქციის თავმჯდომარე. შეხვედრას არ ესწრებიან „ლელოსა” და „საქართველოსთვის” წევრები.

კობახიძემ სიტყვით გამოსვლისას უმაღლეს ეროვნულ ამოცანად საქართველოს ტერიტორიული მთლიანობის მშვიდობიანი გზით აღდგენა დაასახელა. მისი თქმით, მთავრობა აქტიურად იზრუნებს ოკუპირებულ ტერიტორიებზე მცხოვრებთა უფლებების დაცვაზე.

„რუსეთ-საქართველოს კონფლიქტის მოგვარება და საქართველოს ტერიტორიული მთლიანობის მშვიდობიანი გზით აღდგენა, არის, ბუნებრივია, ჩვენი არა მარტო სამთავრობო პრიორიტეტი, არამედ უმაღლესი ეროვნული ამოცანა.

პარალელურად გაგრძელდება, ბუნებრივია, არაღიარების პოლიტიკის წარმატებით წარმოება. ამ მხრივ ჩვენი მთავრობის საქმიანობა წარმატებული იყო მთელი ამ წლების განმავლობაში. ასევე გავაგრძელებთ აქტიურ მუშაობას მომავალში და აქტიურად ვიზრუნებთ ოკუპირებულ ტერიტორიებზე მცხოვრები ჩვენი თანამოქალაქეების უფლებებისა და ინტერესების დაცვაზე. გაგრძელდება შერიგებისა და ჩართულობის პოლიტიკის სათანადოდ განხორციელება”, – განაცხადა კობახიძემ.

როგორც პრემიერ-მინისტრობის კანდიდატმა თქვა, ამჟამად პარლამენტის წინაშე წარადგინა 10-თვიანი გეგმა, რომელშიც საუბარია დაწყებული ინიციატივების ბოლომდე მიყვანაზე.

„ამის შემდეგ, საპარლამენტო არჩევნების შემდეგ, ჩვენი საარჩევნო პროგრამის საფუძველზე წარმოგიდგენთ 4-წლიან სამთავრობო პროგრამას, რომელშიც ასახული იქნება სამთავრობო ინიციატივები”, – დაამატა ირაკლი კობახიძემ.