“ბავშვთა ქორწინება რჩება ერთ-ერთ უმწვავეს პრობლემად, რომელიც გავრცელებულია მთელი საქართველოს მასშტაბით” – გოგა ხატიაშვილი

იურისტი, გოგა ხატიაშვილი:

“ბავშვთა ქორწინება რჩება ერთ-ერთ უმწვავეს პრობლემად, რომელიც გავრცელებულია მთელი საქართველოს მასშტაბით.

ხშირად ის ვლინდება ისეთ დანაშაულებში, როგორიცაა: ქორწინების იძულება, გაუპატიურება, თავისუფლების უკანონო აღკვეთა და ა.შ. ხშირად ისინი ჩადენილია ქორწინების იძულების მიზნით.

პრევენციის გარდა, ასეთი შემთხვევების დროული გამოვლენა და მათზე ეფექტიანი რეაგირებაა საჭირო.

პირველ ეტაპზე, სკოლას, მანდატურის სამსახურს, საგანმანათლებლო და სკოლისგარეშე სახელოვნებო ან/და სასპორტო საგანმანათლებლო დაწესებულებას, ადგილობრივ თვითმმართველობას, პოლიციას, სამედიცინო სერვისების მიმწოდებლებს (მათ შორის, სოფლის ექიმებს), აქვთ ვალდებულება გამოვალინონ მსგავსი ფაქტები და ბავშვზე ძალადობის საფუძვლიანი ეჭვის არსებობისას – გადაამისამართონ (შეტყობინება განახორციელონ) პოლიციასა და სახელმწიფო ზრუნვის სააგენტოში. ეს ვალდებულება განსაზღვრულია კანონით.

პოლიციისათვის შეუტყობინებლობა ისეთი დანაშაულების, როგორიცაა არასრულწლოვნის გაუპატიურება ან/და თავისუფლების უკანონო აღკვეთა, ასევე დანაშაულია და ისჯება.

შესაბამისად, სისხლის სამართლის პასუხისმგებლობა უნდა დადგეს ყველამ იმ პირის, ვისაც ჰქონდა ინფორმაცია, გადამისამართების ვალდებულება, მაგრამ ეს არ გააკეთა.

უფრო მეტიც, ხშირად ასეთი დანაშაულები ჩადენილია რამდენიმე პირის მიერ და სხვებიც მონაწილეობენ მასში, რაც ასევე, მათთვის პასუხისმგებლობის დაკისრების საფუძველია.”