სხალთის ეპარქიაში მოღვაწე მღვდელი ფილიპე აბაშიძე, სოციალურ ქსელში, წერს:
“რამდენად უგუნური უნდა იყო, რომ პრემიერს ჰკითხო ზიარების საიდუმლოს შესახებ, რომელიც ორიათასი წელია მოქმედებს ეკლესიაში და მისი საიდუმლოების გარკვევა, თუ როგორ ხდება პურისა და ღვინოს შეცვლა ქრისტეს სისხლად და ხორცად დღემდე ამოუხსნელია.
თვით ზეციური ანგელოზები, რომლებიც უხილავად მყოფობენ წირვის დროს და სიხარულით ისმენენ სახარებას, იმათთვისაც კი დაფარულია ეს საოცარი საიდუმლო!
დღეს გამოდის ვიღაც ჟურნალისტი და პრემიერს ეკითხება შემაძრწუნებელი საიდუმლოს შესახებ!
ღვთის ანგელოზები შიშით და მოწიწებით დგანან ქრისტეს საიდუმლოების წინაშე! რას შეიძლება შევადაროთ ამათი უვიცობა და სულიერი სიღატაკე?
უნებლიეთ ებრძვიან ქრისტეს, აბა ცნობიერად სად აქვთ ორი თავი ქრისტეს შეებრძოლონ! ვინც შეებრძოლა ქრისტეს შეგნებულად, იულიანე განდგომილს ვგულისხმობ, მოუწია გულგანგმერილს დაძახება,,შენ გაიმარჯვე ნაზარეველო” ამათი უცოდინარობა მაგონებს კაიაფა მღვდელმთავრის სიტყვებს, როცა ქრისტეზე ამბობს:,,მისი სიცოცხლე საფრთხის შემცველია, ამიტომ უნდა მოკვდესო”!
იგივეს იძახიან დღეს ქრისტეს ზიარებაზე. ,,კოვზი საფრთხის შემცველია” უგუნურო, იმ კოვზზე ვინ იმყოფება? ვისი სხეულია მასზე? შენ კოვზს კი არ ებრძვი და ბარძიმს, ქრისტეს ებრძვი შენი სიბრმავით! ჩვენ ქრისტიანები კოვზს და ბარძიმს კი არ ვეთაყვანებით, არამედ მასზე დაბრძანებულ ქრისტე მაცხოვარს!
კოვზი და ბარძიმი ერთი და იგივე საშუალებაა ქრისტეს სიწმიდის მისაღებად. კოვზი პატარა ბარძიმია ერისკაცთა საზიარებლად. მასზე სამყაროს განკაცებული ღმერთის სისხლია და ხორცი. როდესაც ეხება ჭურჭელს, ყველაფრისგან წმინდავს მას!
თუ შენ ქალაქის წყალში ქლორს ურევ, რომ ბაქტერიები მოკლას, მითუმეტეს სამყაროს შემოქმედის მიერ მოცემული თავისი ყოვლადწმიდა სისხლი და ხორცი რამდენად განწმინდავს კოვზს! წაიკითხეთ ჩვენი მეფეთა ცხოვრება, როგორი მოკრძალება ჰქონდათ ზიარების საიდუმლოებასთან! არც ერთი არ გასულა ამ ქვეყნიდან უზიარებელი! თუ არ იცი მას ჰკითხე ვინც ახლოს არის ამ საიდუმლოსთან! გემის შესახებ, თუ გინდა გაიგო მის კაპიტანს უნდა ჰკითხო! მთის მწერვალზე ასვლა თუ გინდა რჩევა მთასვლელს უნდა ჰკითხო! ეკლესიაში რა საიდუმლოებები აღესრულება და როგორ პატრიარქს უნდა ჰკითხო! ხელზე რომ ემთხვევი ეგ იმიტომ არის დადგენილი, რომ ამით გამოხატავ მზადყოფნას, რომ მას დაუჯერო! თქვენ კიდევ ზიარების საიდუმლოების შესახებ, რომელიც სულიერია უფრო მეტად ვიდრე ხორციელი, ეკითხები არა მის მფლობელს, არამედ თვითონაც რომ არ იცის ამის შესახებ! ! რა ჰქვის ასეთ საქციელს? უგუნურება!”
კომენტარები