პოლიტოლოგი, გია ხუხაშვილი:
“ინფორმაცია და თხოვნა ჩემს FB-მეგობრებთან:
ჩვენ, რამდენიმე თანამოაზრემ, შევქმენით სამოქალაქო პლატფორმა “შინ მომავლისთვის”, რომელიც მიზნად ისახავს მთელ მსოფლიოში მიმოფანტული ქართული ინტელექტუალური, პროფესიული, ცივილიზაციური და სხვა რესურსის კონსოლიდაციას და ქართული სახელმწიფოს ინტერესებში მიმართვას.
ჩვენი ამოცანაა ხელი შევუწყოთ ყველა თაობის თანამემამულის შემობრუნებას სამშობლოსკენ, როგორც ფიზიკურად, ასევე ნებისმიერი სხვა ფორმით დაბრუნების სახით.
ღრმად ვართ დარწმუნებული, რომ ასე წვეთ-წვეთად გაბნეული ენერგიის ერთ კალაპოტში მიმართვა, შიგა რესურსის სიმწირის პირობებში, ქვეყანას მისცემს ესოდენ სასიცოცხლოდ მნიშვნელოვან ბიძგს სწრაფი განვითარების გზაზე დადგომისთვის, ისე, როგორც ეს თავის დროზე მოხდა ისრაელში, თუ ირლანდიაში.
ჩვენ უკვე ვმოქმედებთ.
აქ ძალიან რომ არ გამიგრძელდეს, დაწვრილებითი ინფორმაციისთვის შეგიძლიათ გამოიწეროთ ჩვენი გვერდი – Homecoming for future • შინ მომავლისთვის და შემოუერთდეთ ჩვენს ჯგუფს – დაბრუნება სამშობლოში
გთხოვთ, მაქსიმალურად “დააშეაროთ” ეს პოსტი, რათა ყველა ემიგრანტმა გაიგოს, რომ არსებობს პლატფორმა, რომელიც მათ ყველანაირად დაეხმარება სამშობლოში მიმდინარე პროცესებში ინტეგრაცია/რეინტეგრაციაში და უზრუნველყოფს მათ ჩართულობას ქვეყნის განვითარებაში.
წინასწარ გიხდით მადლობას საკითხის მნიშვნელობის გააზრებისა და თანადგომისთვის.
აქვე მინდა ჩვენი პატივისცემა გამოვხატო ყველა მოქმედი ემიგრანტული ორგანიზაციის მიმართ და ვუთხრა მათ, რომ თქვენი და ჩვენი საქმიანობა ყველანაირ პოლიტიკურ გემოვნებაზე, თუ კუთვნილებაზე მაღლა დგას და მიმართულია გრძელვადიანი სახელმწიფო მიზნების აღსრულებისკენ.
გთავაზობთ, გავაერთიანოთ ჩვენი ძალისხმევა, შევქმნათ ერთიანი მსოფლიო ქსელი და ამისათვის გამოვიყენოთ ეს პლატფორმა, რომელიც თანაბრად გვეკუთვნის ჩვენ ყველას.
ჩვენის მხრივ, გაძლევთ პირობას, რომ თქვენი კეთილი საქმეების შესახებ გაიგებს მთელი საქართველო და ერთიანი ძალებით გადავჭრით ყველა პრობლემას, რომელიც დღეს შესაძლოა გადაულახავად გეჩვენებათ – “ძალა ერთობაშია!”
კომენტარები