მას შემდეგ, რაც თავდაცვის სამინისტროს ეროვნული გვარდიის სამოქალაქო ოფისის დასუფთავების სამსახურის თანამშრომლებს კორონავირუსი დაუდასტურდათ, სამხედრო და სამოქალაქო თანამშრომლების დიდი ნაწილი იზოლაციაში გადავიდა. ამის შესახებ “2020NEWS“-ს კავკასიის საკითხებში ექსპერტმა მამუკა არეშიძემ განუცხადა.
როგორც არეშიძე სააგენტოსთან აცხადებს, მის ხელთ არსებული ინფორმაციით, კარანტინში ამ დროისთვის, დაახლოებით, 56 თამაშრომელი იმყოფება, მათგან სამხედრო უფრო მეტია, ვიდრე სამოქალაქო პირი.
“ეროვნულ გვარდიაში თვითიზოლაციის პროცესი კარგა ხანია, რაც დაწყებულია – მაშინ, როდესაც 6 ადამიანს კორონავირუსი დაუდგინდა. საუბარია ხუთ დამლაგებელზე და ერთ სამოქალაქო თანამშრომელზე. მას შემდეგ თვითიზოლაციაში იყო ბევრი, შესაძლოა, 56 თანამშრომელი. ერთი ნაწილისთვის თვითიზოლაცია დამთავრდა და მათ გზადაგზა მეორე ნაწილი მიემატა, როგორც სამოქალქო ისე, სამოქალაქო თანამშრომლები. ახლა რა პროცენტია სამოქალაქო და სამხედრო თანამშრომლების კარანტინში მოთავსებული?! მემგონი, სამხედრო უფრო მეტია, რადგან სამოქალაქო თანამშრომლები სახლებში გაუშვეს, რადგან იქ გაევლოთ თვითიზოლაცია“,- განაცხადა არეშიძემ.
მალავს თუ არა თავდავის სამინისტრო ინფიცირებული სამხედროების შესახებ ინფორმაციას? არეშიძის განცადებით, თავდაცვის სამინისტრო სავარაუდოდ, ინფორმაციას არ მალავს, რადგან სხვა შემთხვევაში, დაინფიცირებულების შესახებ ინფორმაცია მისთვის ცნობილი იქნებოდა.
“ვფიქრობ, რომ თავდაცვის სამინისტრო ინფიცირებულების შესახებ ინფორმაციას არ მალავდეს. სამინისტროს არ აქვს უფლება, რომ ინფორმაცია ჯანდაცვის სტრუქტურებს დაუმალოს. მაგრამ უწყებას აქვს უფლება, რომ ინფორმაცია საზოგადად არ გაახმაუროს. ეროვნული გვარდიის სამხედრო თანამშრმლები ინფიცირებულები რომ ყოფილიყვნენ, მე აუცილებლად მეცოდინებოდა“,- განაცახდა არეშიძემ.
“2020NEWS” ჯერ კიდევ ორი კვირის წინ ფლობდა სკანდალურ ინფორმაციას ეროვნული გვარდიის ხელმძღვანელებზე და ჯარისკაცების სავარაუდო დაინფიცირებაზე, რაც ღარიბაშვილის უწყებამ მაშინ კატეგორიულად უარყო.
მაშინ სააგენტოს წყარო აცხადებდა, რომ კორონავირუსით დაინფიცირებულები სამხედრო პირებიც იყვნენ. მამუკა არეშიძე კი აცხადებდა, რომ თავდაცვის სამინისტროს ერთ-ერთი უწყების ხელმძღვანელებმა დაუდევრობა გამოიჩინეს და სიცხიანი თანამშრომლები სამსახურში ატარეს. ამ ფაქტმა კი ჯარში ეპიდაფეთქების საფრთხე გააჩნია.
“თავდაცვის სამინისტროს ერთ-ერთმა უწყებამ სიმართლე დამალა. იქ ადამიანები სიცხიანი დადიოდნენ, რაზეც რეაგირება ხელმძღვანელობამ იმ დრომდე არ მოახდინა, ვიდრე ეს ამბავი თავდაცვის მინისტრამდე არ მივიდა“, – უთხრა რამდენიმე კვირის წინ არეშიძემ სააგენტოს.
შეგახსენებთ, დღეს მედიაში გავრცელდა ინფორმაცია, რომ კარანტინში იმყოფება ეროვნული გვარდიის 40 სამხედრო მოსამსახურე, რომელთაგან 8-ს კორონავირუსი უკვე დაუდასტურდა. არსებული ინფორმაციით, ისინი გორის სამხედრო ჰოსპიტალში არიან გადაყვანილი. თუმცა ამ ინფორმაციას თავდაცვის სამინისტრო არ ადასტურებს.
ინფორმაციისთვის, 28 მარტს თავდაცვის სამინისტროს ეროვნული გვარდიის სამოქალაქო ოფისის დასუფთავების სამსახურის 6 თანამშრომელს კორონავირუსი დაუდასტურდა. სამინისტროს ინფორმაციით, ეს ადამიანები 21 მარტიდან თვითიზოლაციაში იმყოფებოდნენ. სამინისტროს განცხადებითვე, “სამოქალაქო ოფისის დასუფთავების სამსახურის თანამშრომლებს სხვა სამხედრო ნაწილებთან შეხება არ ჰქონიათ.
ყველა ინფიცირებული გადაყვანილია სამინისტროს სამხედრო ჰოსპიტალში“. 30 მარტს კი, ჩატარებული სკრინინგის საფუძველზე, გორის სამხედრო ჰოსპიტალის საკარანტინო სივრცეში მოთავსებული 10 პირიდან ოთხს კორონავირუსი დაუდასტურდა. როგორც ირკვევა, ყველა მათგანს ეროვნული გვარდიის სამოქალაქო ოფისის დასუფთავების თანამშრომლებთან ჰქონდათ შეხება.
2020 ნიუსი
კომენტარები