“იყო სასჯელი და ეს სასჯელი მოიხსნა, რა საფასური?” – რა “სასჯელი” მოუხსნა ოკუპანტმა რუსეთმა საქართველოს?

“ქართული ოცნების” თავმჯდომარე, ირაკლი კობახიძე ამერიკის ელჩის საპასუხოდ, რუსეთის პრეზიდენტის მიერ პირდაპირი ფრენების აღდგენასა და სავიზო რეჟიმის გაუქმებაზე, ამბობს:

“მე არ ვიცი ეს, რა თქმა უნდა, ვერავითარი საფასური ჩვენი მხრიდან ვერაფერთან დაკავშირებით ვერ იქნება გადახდილი. იყო სასჯელი, რომელიც დაეკისრათ საქართველოს მოქალაქეებს, 2019 წელს და ეს სასჯელი მოიხსნა ცალმხრივად. რა საფასურზე შეიძლება იყოს აქ საუბარი, რა თქმა უნდა, აბსოლუტურად გაუგებარია, ამიტომ მეტ სიღრმეში არ მინდა შევიდე, თორემ სხვანაირი კომენტარებიც შეიძლება გაკეთდეს ამასთან დაკავშირებით. რა თქმა უნდა, როცა საუბარია სასჯელის ცალმხრივად მოხსნაზე, აქ რა საფასურზე შეიძლება იყოს საუბარი, აბსოლუტურად გაუგებარია”.

საქართველოში ამერიკის ელჩი, კელი დეგნანი კიდევ ერთხელ იმეორებს, რომ ჩნდება კითხვები, რატომ მიიღო რუსეთის პრეზიდენტმა პუტინმა საქართველოსთან პირდაპირი ფრენების აღდგენისა და უვიზო მიმოსვლის შემოღების გადაწყვეტილება ახლა. მისი თქმით, პუტინი მისი ნაბიჯების სანაცვლოდ ყოველთვის ითხოვს საფასურს და საკითხავია რა იქნება ეს საფასური ქართველებისთვის.