„ნაციონალური მოძრაობის“ რაიონული ორგანიზაციის თავმჯდომარის პოსტის დასაკავებლად ბრძოლა გადამწყვეტ ფაზაში შედის. წალენჯიხაში აღნიშნული პოსტის დასაკავებლად ორი კანდიდატი, მამუკა ქარდავა და ბაჩო ქანთარია იბრძვიან.
როგორც კანდიდატების მხარეები ამტკიცებენ, ისინი პარტიის პოლიტსაბჭომ წარადგინა, თუმცა, როგორც ენმ-ს ცენტრალურ ოფისში აცხადებენ, პარტიის პოლიტსაბჭომ, ნამდვილად წარადგინა მამუკა ქარდავა. ხოლო, რაც შეეხება, ბაჩო ქანთარიას, ის „ნაციონალურ მოძრაობაში“ არ ირიცხება და არც არასდროს ირიცხებოდა. შესაბამისად, ბაჩო ქანთარიას კანდიდატურა „ნაციონალური მოძრაობის“ პოლიტსაბჭოს არ წარუდგენია.
„პარტიაში დემოკრატიული პოლიტიკური პროცესები მიმდინარეობს. წალენჯიხის რაიონული ორგანიზაციის თავმჯდომარის პოსტზე, მამუკა ქარდავას კანდიდატურა გია ხარჩილავამ, თემურ ჯანაშიამ და ირაკლი ნადირაძემ წარადგინეს“, – აცხადებენ პარტიაში.
შეგახსენებთ, რომ “ნაციონალური მოძრაობის“ პოლიტიკური საბჭოს საბოლოო ფორმირებისა და სტრუქტურების ჩამოსაყალიბებლად, ყველა რაიონულ ორგანიზაციაში, კერძოდ, 63 მუნიციპალიტეტში, არჩევნები 17-20 მაისს ჩატარდება.
კომენტარები