რატომ ტოვებს “ოცნება” ევროპის სოციალისტური პარტიის დამკვირვებელი წევრის სტატუსს? – კობახიძის განმარტება

ირაკლი კობახიძემ „ქართული ოცნების“ ოფისში გამართულ ბრიფინგზე განაცხადა:

„ევროპის სოციალისტური პარტია გარიცხვით დაგვემუქრა ღმერთის, ოჯახისა და სამშობლოს პატივისცემის გამო. პრემიერმა მიიღო მონაწილეობა კონფერენციაში და ამაზე მეტზე იქ არაფერზე იყო საუბარი. საუბარი იყო იმაზე თუ როგორ უნდა ვცეთ პატივი ამ იდეებს, რასაც ჰქვია ღმერთი, სამშობლო და ოჯახი. როდესაც ამისთვის გემუქრებიან პარტიიდან გარიცხვით, ბუნებრივია, სხვა ნაბიჯის საშუალება არ გრჩება. მით უმეტეს, როცა ამ მუქარას აჟღერებენ ევროპელი პენსიონერების მძარცველი კეზერაშვილის ტელევიზიის საშუალებით. რეალურად, ეს იყო ჩვენი მხრიდან ერთგვარი სავალდებულო ნაბიჯი, რაც გამომდინარეობდა ამ პოლიტიკური პარტიის ლიდერების განცხადებებიდან. სხვა გზა უბრალოდ არ გვქონდა“, – განაცხადა კობახიძემ.

„ქართული ოცნება“ ევროპის სოციალისტური პარტიის დამკვირვებელი წევრის სტატუსს, ასევე ამ პარტიასთან დაკავშირებულ სხვა გაერთიანებებს ტოვებს. გადაწყვეტილება მმართველი პარტიის პოლიტსაბჭომ მიიღო.