“როგორც ერთ, ისე მეორე შემთხვევაში, ხელისუფლებას ელის სრული კრახი” – დავით ზურაბიშვილი

პირადად მე ნაკლებად სავარაუდო მგონია, რომ ლგბტ პროპაგანდაზე კანონის მიღებას ხელისუფლება ახლავე შეეცადოს. უფრო ვფიქრობ, რომ ისინი ჯერ მოსინჯავენ ნიადაგს, დააკვირდებიან ხალხის რეაქციას, პარალელურად კი დაელოდებიან კანდიდატის სტატუსის მიღებას, რასაც ოპოზიციის დიდი ნაწილის პოზიციის წყალობით ძალიან მარტივად მიიწერენ საკუთარ წარმატებად, ხოლო ამ, მათი აზრით, ჯოკერის გათამაშებას, წინასაარჩევნოდ დააპირებენ იმ გათვლით, რომ ოპოზიცია, სამოქალაქო საზოგადოება და სრულიად დასავლეთი “გლობალური გა@იდარასტების პარტიად” და მათ აგენტურად წარმოაჩინონ, რაც, (ასევე მათი აზრით) გამარჯვების უტყუარი გარანტია გახდება. იგივე მოხდება იმ შემთხვევაშიც, თუ წლის ბოლოს კანდიდატის სტატუსი არ მოგვცეს – ხელისუფლებისთვის ეს იქნება კიდევ ერთი არგუმენტი იმისა, რომ დასავლეთს მხოლოდ გა@იდარასტებულები და ომში ჩათრეულები ვუნდივართ და ამაში მათ ხელს უწყობს ადგილობრივი ოპოზიცია და სამოქალაქო საზოგადოება.

ცხადია, არც იმის გამორიცხვა შეიძლება, რომ ლგბტ პროპაგანდის აკრძალვაზე კანონის მიღებას ახლავე დააპირებენ, რაც ცალსახად იქნება კანდიდატის სტატუსის საბოტაჟი. ამის მიზეზი კი შეიძლება იყოს მხოლოდ ერთი: პირდაპირი დავალება მოსკოვიდან. ყველა სხვა ვარიანტი გამორიცხულია, რადგან ხელისუფლების პარანოიდული ლოგიკიდან გამომდინარე ჰომოფობიური პროპაგანდით ოპოზიციასთან დაპირისპირება ყველა ვარიანტში წინასაარჩევნოდ უფრო მომგებიანად გამოიყურება.

თუმცა, დარწმუნებული ვარ, რომ როგორც ერთ, ისე მეორე შემთხვევაში, ხელისუფლებას ელის სრული კრახი. მარტის დღეებში ის ასიათასობით ადამიანი რუსთაველზე ენჯეოების ფინანსური ინტერესების დასაცავად კი არ გამოსულა, არამედ ყველამ ცხადლივ დაინახა, რომ აგენტებზე კანონის მიღება ნიშნავდა ევროპულ ორიენტაციაზე უარს და რუსეთის გავლენის სფეროში გადასვლას. ქვეყნის სტრატეგიული ინტერესების ღალატის მცდელობაზე კი ქართველ ხალხს ყოველთვის სათანადო რეაქცია ექნება, როგორც არ უნდა შეფუთონ იგი. აღარაფერს ვამბობ იმაზე, რომ მეორე რუსული კანონის მიღებას დასავლეთიდანაც ისეთი რეაქცია მოჰყვება, რომ შვეიცარიის ბანკთან დავა თამაშად და უჩნდეთ მღერად. ასეთ ორმხრივ ზეწოლას კი, როგორც პრაქტიკა ცხადყოფს, საქართველოში ვერცერთი ხელისუფლება ვერასდროს ვერ უძლებს.”