სტრასბურგის ადამიანის უფლებათა ევროპულმა სასამართლომ საქმეზე საქართველო რუსეთის წინააღმდეგ (II) რუსეთისთვის კომპენსაციის დაწესების საკითხი განიხილა და დააკმაყოფილა. სტრასბურგის სასამართლოს ვებგვერდზე გამოქვეყნებული ინფორმაციის თანახმად, სასამართლომ 2008 წლის აგვისტოს ომის საქმეზე რუსეთის ფედერაცია გაამტყუნა და მას კომპენსაციის სახით ჯამში 129 827 500 მილიონი ევროს გადახდა დააკისრა.
„საქმე ეხებოდა 2008 წლის აგვისტოში საქართველოსა და რუსეთის ფედერაციას შორის შეიარაღებულ კონფლიქტთან დაკავშირებით საქართველოს ხელისუფლების ბრალდებებს რუსეთის ფედერაციის მხრიდან კონვენციის სხვადასხვა მუხლის დარღვევის თაობაზე“, – აღნიშნულია ინფორმაციაში.
სასამართლომ მისაღებად ცნო მოცემულ საქმეში ოკუპირებულ ცხინვალის ქართულ სოფლებსა და „ბუფერულ ზონაში” მშვიდობიანი მოსახლეობის მიმართ ჩადენილი დანაშაულების მიმართ ადამიანის უფლებათა ევროპული კონვენციის 41-ე მუხლი, რომელიც სამართლიან დაკმაყოფილებას გულისხმობს.
დანაშაულები სეპარატისტული ძალების მიერ მშვიდობიანი მოსახლეობის დახოცვას, მათი სახლების გაძარცვას და გადაწვას, დამამცირებელ და არაადამიანურ მოპყრობას, ომის ტყვეთა წამებას და დევნილთათვის საკუთარ სახლებში დაბრუნებაზე წინააღმდეგობის გაწევას გულისხმობს.
ცნობისთვის, ადამიანის უფლებათა დაცვის ევროპულმა სასამართლომ 2021 წელს რუსეთს პასუხისმგებლობა დააკისრა ადამიანის უფლებათა ევროპული კონვენციის ექვსი მუხლის დარღვევაზე (სიცოცხლის უფელბა, წამების აკრძალვა, საკუთრების უფლება, პირადი ცხოვრება, გადაადგილების უფლება) და ასევე, პროცედურული თვალსაზრისით მე-2 მუხლის დარღვევაზე, რაც გულისხმობს იმას, რომ მან ვერ უზრუნველყო ეფექტიანი გამოძიება 2008 წლის ომის შემდეგ სიცოცხლის უფლების სავარაუდო დარღვევის ფაქტზე.
კომენტარები